قر اقپارات جانە قوعامدىق دامۋ ءمينيسترى ايدا بالاەۆا بىرنەشە اكىمدىكتىڭ سايتىن سىنعا الدى. ءمينيستردىڭ ايتۋىنشا، اتىراۋ، اقتوبە، جامبىل وبلىسى مەن نۇر-سۇلتان، الماتى قالاسىنىڭ اكىمدىكتەرىنىڭ رەسمي سايتىندا اقپاراتتار ايلاپ جاڭارمايدى.

اقپاراتقا قول جەتكىزۋ ماسەلەلەرى جونىندەگى كوميسسيانىڭ ونلاين وتىرىسىندا مەملەكەتتىك ورگانداردىڭ ينتەرنەت رەسۋرستارى تۋرالى تسيفرلىق دامۋ، يننوۆاتسيالار جانە اەروعارىش ونەركاسىبى ۆيتسە-ءمينيسترى ابىلايحان وسپانوۆ باياندادى.

«مەملەكەتتىك ورگانداردىڭ ينتەرنەت رەسۋرستارىنىڭ بىرىڭعاي پلاتفورماسىندا 76 مەملەكەتتىك ورگان جانە 17 جەرگىلىكتى اتقارۋشى ورگاندى كوشىرۋدى جوسپارلادىق. الايدا وسىنىڭ ىشىنەن تەك 69 مەملەكەتتىك ورگان جانە 12 جەرگىلىكتى اتقارۋشى ورگان كوشىرىلدى. 863 مەملەكەتتىك قىزمەتتىڭ پاسپورتى تولتىرىلدى. ءتيىستى جۇمىس اتقارىلىپ جاتىر. وسى جىلدىڭ اياعىنا دەيىن جوسپارلانىپ جاتقان جۇمىستاردى اياقتايمىز دەپ ۇمىتتەنەمىن», - دەدى ابىلايحان وسپانوۆ.

ۆيتسە-مينيستر بايانداماسىن اياقتاعان سوڭ ايدا بالاەۆا بۇل مينيسترلىك مەملەكەتتىك ورگانداردىڭ ينتەرنەت رەسۋرسىن - پورتالدى اشقان كەزدە نەلىكتەن مينيسترلىكتىڭ (تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى - اۆت.) اتاۋى شىعاتىنىن سۇرادى.

«بۇل ەندى بارلىق مەملەكەتتىك ورگاننىڭ رەسۋرستارى قوسىلعاننان كەيىن سىزدىكى شىقپاۋى كەرەك قوي. سوندىقتان بۇل ولقىلىقتى دۇرىستاۋ كەرەك سياقتى. ايتپەسە، بىردەن مينيسترلىك اتاۋى شىعادى», - دەدى بالاەۆا.

«تۇسىنىكتى، ايدا عالىمقىزى، جەدەل تۇردە ونى تۇزەتەمىز» ، - دەپ ۋادە ەتتى ۆيتسە-مينيستر وسپانوۆ.

سونداي-اق، اقپارات جانە قوعامدىق دامۋ ءمينيسترى بىرقاتار اكىمدىكتىڭ رەسمي سايتىندا اقپاراتتىڭ جاڭارتىلماي تۇراتىنىن سىنادى.

«وسى جەردە اتىراۋ، اقتوبە، جامبىل وبلىسى مەن نۇر-سۇلتان، الماتى قالاسىنىڭ اكىمدىكتەرىنە وسى باعىتتا جۇمىستى بەلسەندى ەتۋىنە نازار اۋدارعىم كەلەدى. سونداي-اق، سۇراق باسقاشا - بۇل رەسۋرستاردىڭ جۇيەلى جاڭارتىلۋىندا. كەيدە اقپارات ايلاپ جاڭارمايدى. بىزگە ۋاقىتى ءوتىپ كەتكەن، ەسكى اقپاراتتىڭ كەرەگى قانشا؟ اقپارات ءاردايىم وزەكتى بولۋى كەرەك. ءبىز دۇرىس اقپارات بەرىلمەي جاتىر، ادامدار وسەك-ايانعا سەنەدى دەپ رەنجيمىز. بىراق بۇعان ءوز رەسۋرستارىمىزداعى اقپاراتتى جاڭارتپاي، ءوزىمىز تۇرتكى بولامىز. مەملەكەتتىك ورگاندار رەسۋرستارىڭىزداعى اقپاراتتىڭ جاڭارتىلىپ وتىرۋىن ەرەكشە باقىلاۋ كەرەك. تۇرعىندارعا اقپارات ۋاقتىلى ءارى دۇرىس بارۋىن قامتاماسىز ەتۋ كەرەك. وسىنى حاتتاما تۇردە اتاپ، ەرەكشە باقىلاۋ كەرەك»  ، - دەدى ايدا بالاەۆا.

ايتا كەتەيىك، اقپارات جانە قوعامدىق دامۋ مينيسترلىگى جانىنان قۇرىلعان اقپاراتقا قول جەتكىزۋ ماسەلەلەرى جونىندەگى كوميسسيانىڭ ونلاين وتىرىسى ءوتىپ جاتىر.

Abai.kz