ازاتتىقتىڭ تاجىك قىزمەتىنە جىبەرگەن ۆيدەودان ميگرانتتاردىڭ شاتىردا تۇرىپ جاتقانىن، اراسىندا اياعى اۋىر كەلىنشەكتەردىڭ بارىن كورۋگە بولادى. ولار 12 كۇننەن بەرى شەكارادان وتۋگە رۇقسات بەرىلۋىن كۇتىپ جاتقانىن ايتادى.

ء"بىزدى بۇل جەردەن بىردەن اۆتوبۋس پەن تاجىكستانعا الىپ كەتەتىن شىعار دەپ ويلادىق. وزبەك بيلىگى ازاماتتارىن الىپ كەتتى. قازىر قولدان جاسالعان شاتىرلاردا جاتىرمىز. كۇندىز ىستىق، تۇندە سۋىق. ءبىزدى وسى جەرگە جەتكىزگەندەر قازاقستان ميگرانتتار ءۇشىن شەكاراسىن ەكى كۇنگە اشتى دەپ ايتقان", - دەيدى ميگرانتتاردىڭ ءبىرى.

تاجىكستاننىڭ رەسەيدەگى ەلشىلىگىنىڭ وكىلى يموميددين ساتتوري تاجىك ازاماتتارى الاياقتاردىڭ قۇربانى بولعانىن جەتكىزدى.

"قازاقستان شەكاراسى جابىق. ەپيدەميولوگيالىق جاعداي قازاقستاندا عانا ەمەس، وزبەكستان مەن قىرعىزستاندا دا ناشارلاپ جاتىر. ماسكەۋدە ميگرانتتاردى شەكاراعا دەيىن جەتكىزىپ بەرەمىز دەيتىن الاياقتار كوپ. ءبىز ولارعا ەسكەرتتىك", - دەدى ەلشىلىك وكىلى.

ونىڭ ايتۋىنشا، رەسەيدەگى تاجىك ازاماتتار تەك بيلىك ۇيىمداستىرعان ارنايى چارتەرلىك رەيستەرمەن عانا ۇشىپ كەتە الادى.

تاجىكستاننىڭ ۋفاداعى كونسۋلدىعى جولدا قالعان ازاماتتارعا چارتەرلىك رەيس ۇيىمداستىرۋعا دايىن ەكەنىن مالىمدەدى. بىراق ميگرانتتار ۇشاققا بيلەت ساتىپ الۋعا مۇمكىندىگىمىز جوق دەيدى.

تاجىكستان 25 ماۋسىمنان بەرى رەسەيدەگى ازاماتتارىن الىپ كەتە باستاعان. بۇل ءۇشىن "تاجىك ەير" جانە "سومون ەير" اۋە كومپانيالارى ماسكەۋ، سانكت-پەتەربۋرگ، قازان، نوۆوسيبيرسك جانە ەكاتەرينبۋرگ قالالارىنان چارتەرلىك رەيس ۇيىمداستىراتىنىن مالىمدەگەن. تاجىك ديپلوماتتارى رەسەيدە ەلىنە قايتقىسى كەلەتىن ميگرانتتار سانى 8 مىڭنان اساتىنىن، ولاردىڭ بارىنە رەيس جەتكىلىكسىز بولاتىنىن ەسكەرتكەن.

Abai.kz