بەيسەنبى, 6 تامىز 2020
COVID-19 قازاقستاندا. جۇقتىرعاندار — 95942. جازىلعاندار — 68871. قايتىس بولعاندار — 1058
1202 0 پىكىر 13 شىلدە, 2020 ساعات 11:43

ءار قازاق – قازاقستان قازىناسى!

كۇللى الەمدى قۇيىنداي جايپاپ وتكەن كەسىرلى، كەساپاتتى كەسەل قازاقستان حالقىنا اۋىر ءتيدى. جۇقپالى ناۋقاسقا شالدىققاندار، كوز جۇمعاندار سانى كۇرت ءوستى. كۇن سايىن ءتۇرلى جامانات حاباردان جەر سەلكىلدەيدى. الەۋمەتتىك جەلىگە كىرۋگە قورقاتىن بولدىق. كوۆيد پەن پنەۆمونيا دەسە جۇرتتىڭ جۇرەگى دىرىلدەيدى. بەينە ءبىر ەشكىمدى اسكەرگە الماي-اق، ساپقا تۇرعىزباي-اق، قان مايداننىڭ قاسابىنا ۇشىراتاتىن، كوزگە كورىنبەيتىن قىرعىن سوعىس ءجۇرىپ جاتقانداي.

بۇل الاپاتقا قارسى تۇرار كۇشىمىز ءالسىز بولىپ شىقتى. اسا قاۋىپتى قاتەرمەن بەتپە-بەت كەلگەن ساتتە بۇرىنعى «كوروناۆيرۋس دەگەن شەتەلدىكتەردىڭ وتىرىك ساندىراعى ەكەن»، «كارانتين، توتەنشە جاعداي» دەگەندەر جۇرتتى ميتينگىگە شىعارماۋ ءۇشىن بيلىكتىڭ ويلاپ تاپقان امالى ەكەن» دەگەن قاڭقۋ سوزدەردىڭ كۇلى كوككە ۇشتى. «بىزدە مەديتسينا مىقتى، ءدارى دە، دارىگەر دە جەتكىلىكتى، اۋرۋحانالار ساي تۇر» دەپ جۇرگەن سەنىمىمىز سۋعا كەتتى. «جاسىرعان كەسەلدى ءولىم اشكەرەلەيدى» دەگەننىڭ كەرى كەلدى. "جەدەل جاردەم" ء"ولدىم" دەسەڭ كەلمەيدى. ويتكەنى اۋرۋحانالاردا ورىن جوق. ورىن تاپقاندارعا ءدارى-دارمەك پەن وتتەگى باللوندارى جەتىسپەيدى. ءدارىحانالاردا كەرەكتى ءدارى جوق، بارىنىڭ باعاسى ۋداي قىمبات. جان بەرمەك وڭاي ما؟ جانتالاسقان جۇرت، اركىم وزىنشە تال قارماۋعا كوشتى. مەملەكەت باسشىسى ق.توقاەۆ جاعدايدى تۇزەۋگە ۇكىمەتكە ەكى اپتا مۇرسات بەردى. پرەزيدەنتتىڭ كوروناۆيرۋسقا قاتىستى جاقىندا جاريالاعان ۇندەۋىنەن كەيىنگى تەكسەرىستە شەتەلدەردەن كەلگەن گۋمانيتارلىق كومەكتەردى حالىقتان جاسىرىپ، قىمتاپ ۇستاپ، قىمقىرىپ ساتىپ، قۇلقىنىن ويلاعان قاسكۇنەمدەر اشكەرەلەندى. بۇل - مالتابارلىق ەمەس، مارودەرلىك قىلمىس!

ءار شاڭىراقتى قايعىنىڭ قارا بۇلتى تورلاپ، ءار بوساعانى ءولىم اڭدىپ جۇرگەندەي. الىسىڭ دا، جاقىنىڭ دا باقيعا كەتىپ جاتىر. اجال ادام تاڭدامايدى، ەشكىمنىڭ باسىنان سيپاپ، مۇسىركەمەيدى. قاراپايىم حالىقتىڭ قاتارىندا نەبىر جاقسى مەن جايساڭدار، تالانتتىلار مەن دارىندىلار دا قايتپاس ساپارعا اتتانۋدا. كەشە عانا جانىمىزدا جۇرگەن جانداردان قاپىدا ايىرىلىپ جاتىرمىز. اللا پاناسىنا السىن! توپىراقتارى تورقا بولسىن!
قاسيەتتى قازاقستان قاسىرەتتى كۇندەردى باسىنان كەشىرۋدە.

13 شىلدە - ۇلتتىق ازا تۇتۋ كۇنى.

ايدىڭ، كۇننىڭ امانىندا ىندەتتىڭ قۇربانى بولعان ازاماتتاردى ەسكە الىپ، قۇران باعىشتاپ، تاۋبەمىزگە كەلەيىك. كەلمەسكە كەتكەندەردىڭ وتباسىنا كوڭىل ايتايىق. «ءولى ريزا بولماي ءتىرى بايىمايدى». تاريح تالقىسىندا نە كورمەگەن حالىقپىز؟! «اقتابان شۇبىرىندىنى» دا، "قىزىل قىرعىندى", اقسوڭكە اشتىق پەن جازىقسىز جازالاۋدىڭ دا نەشە اتاسىن، نازالى ناۋبەتىن كورگەن ۇلى قازاق - تامىرى تازا، ءدىڭى مىقتى ۇلتپىز! بۇل قىستالاڭ كۇندەر دە وتەر-كەتەر. سالىمىز سۋعا كەتىپ، ساعىمىز سىنباسىن! ءاربىر قازاق - قازاقستاننىڭ قازىناسى، مەملەكەت بايلىعى! قاسىمىزدا جۇرگەن ءار ادامعا قازىنانى قورىعانداي قامقورلىقپەن قاراپ، كوزىمىزدىڭ قاراشىعىنداي ساقتاي بىلەيىك. اڭدىپ جۇرگەن اجالعا الدىرمايىق، قۇردان-قۇر ايىرىلىپ، قول قۋسىرىپ قاراپ وتىرمايىق. ءبىر-بىرىمىزگە قول ۇشىن بەرىپ، جاناشىرلىقپەن جان ساقتايىق. ۇمىتپەن ءومىر سۇرەيىك. ەلىمىزدىڭ ىرگەتاسىن ۇستاپ تۇرعان بىرلىگىمىزدى قادىرلەيىك. ار-نامىسىمىز امان بولسىن. كەلەشەككە دەگەن سەنىمنەن ايىرىلمايىق! اۋىرعانداردىڭ تەزىرەك ساۋىعۋىن تىلەيىك! ساقتانىپ جۇرىڭىزدەر! عۇمىرلى بولىڭىزدار!

ۇلىقبەك ەسداۋلەت 

قازاقستان جازۋشىلار وداعىنىڭ توراعاسى

Abai.kz

0 پىكىر