جەكسەنبى, 9 تامىز 2020
COVID-19 قازاقستاندا. جۇقتىرعاندار — 98701. جازىلعاندار — 72273. قايتىس بولعاندار — 1058
46 - ءسوز 1314 13 پىكىر 11 شىلدە, 2020 ساعات 13:19

ناقتى ىسكە ۇلاسپاعان سىن قۇرعاق سوزدەن اسا المايدى

كوروناۆيرۋس ەلدىڭ قالىپتى الەۋمەتتىك-ەكونوميكالىق ومىرىمەن قاتار، قوعامدىق تىرشىلىگىن ءبىرشاما بۇعاتتاپ تاستادى. ەسەسىنە حالىقتىڭ كۇيزەلىسى ىشتەگى نارازىلىقتى كۇشەيتىپ كەلەدى. بۇنىڭ ارتى نەگە اكەلەتىنى كىمدى دە الاڭداتادى. اينالىپ كەلگەندە كەز-كەلگەن ەلدىڭ العا باسۋى مەيلىنشە وركەنيەتتى جولمەن ىسكە اسقانى ماڭىزدى.

وسىنداي تەتىكتەردىڭ ءبىرى - الدا كەلە جاتقان ءماجىلىسى مەن ماسليحاتتارعا سايلاۋ. اتالعان ناۋقانعا نەبارى جارتى-اق جىل قالدى. وكىنىشكە وراي وپپوزيتسيالىق باعىتتاعى تىركەلگەنى بار، تىركەلمەگەنى بار ساياسي كۇشتەردىڭ جاعدايى كوڭىل كونشىتپەيدى. ءبىرى سايلاۋ الدىندا ءبىر اي قالعاندا عانا وياناتىن داعدىسىمەن ءالى قالىڭ ۇيقىدا جاتسا، ەندى ءبىرى جىك-جىككە ءبولىنىپ ورتاق مامىلەگە سول كۇيى كەلە الماۋدا. ەكى ورتادا كورىپ وتىرعانىمىز – بيلىك پارتياسىنىڭ ارەكەتتەرى.

كوروناۆيرۋستان جاپا شەككەن ازاماتتارعا قول ۇشىن سوزعان “بىرگەمىز” قورى ءيا پارتيا ىشىندەگى باسەكەلەستىكتى اشىق تۇردە جۇرگىزۋدى كوزدەگەن پرايمەريز وتكىزۋ جايىنداعى باستاما سونىڭ ءبىر كورىنىسى. راس، بۇنى ارقالاي باعالاۋعا بولار. دەسە دە اتاۋىندا “حالىقتىق” دەگەن ءسوز بار بيلەۋشى پارتيا ىشتەي رەفورمالانىپ سول حالىقتىڭ سەنىمىن قايتارۋعا كۇش سالىپ وتىرعانىن دا جوققا شىعارۋعا بولماس.

بۇل تۇرعىدا وتكەن جولى ءبىر توپ قوعام بەلسەندىلەرىنىڭ نۇر-وتان پارتياسىن جاقتاۋشىلارى ليگاسىن قۇرعانىن وڭ باعالاۋعا تۇرارلىق. ولاردىڭ جاساعان مالىمدەمەسىنە قاراعاندا ليگا بيلەۋشى پارتيانى كوز جۇما قولداۋ ءۇشىن ەمەس، ءبىرىنشى كەزەكتە وعان الەۋمەتتىك تەڭدىكتى ورناتۋ بويىنشا ەلدىڭ تالابىن جەتكىزۋدى العا تارتادى.

البەتتە، بۇدان ەشنارسە شىقپايدى، ءبارى تەك الداپ-ارباۋ دەگەن باياعى انگە قايتا باسۋعا بولادى. تەك ناقتى ىسكە ۇلاسپاعان سىننىڭ ءوزى قۇرعاق سوزدەن اسا الماعانىنا قاي زامان؟ ساباق شىعارار كەز كەلدى.

راسۋل جۇمالىنىڭ الەۋمەتتىك جەلىدەگى جازباسى

Abai.kz

13 پىكىر