بەيسەنبى, 13 تامىز 2020
COVID-19 قازاقستاندا. جۇقتىرعاندار — 101372. جازىلعاندار — 76756. قايتىس بولعاندار — 1269
1243 2 پىكىر 10 شىلدە, 2020 ساعات 10:54

اقش قىتاي شەنەۋنىكتەرىنە قارسى سانكتسيا سالدى

قۇراما شتاتتار ۇيعىرلار قۇقىعىنىڭ بۇزىلۋىنا سەبەپشى بولعان دەگەن قىتايدىڭ جوعارعى لاۋازىمدى ءتورت شەنەۋنىگىنە سانكتسيا سالدى. شەكتەۋ ماگنيتسكي اكتىسى اياسىندا ەنگىزىلگەن. بۇل جونىندە اقش قارجى مينيسترلىگى مالىمدەدى.

سانكتسياعا سايكەس، قىتايدىڭ شىڭجاڭ ايماعىنىڭ گۋبەرناتورى چەن تسيۋانگوعا، ايماقتىڭ ساياسي جانە زاڭ كوميتەتىنىڭ بۇرىنعى باسشىسى زۋ حايلۋنعا، قاۋىپسىزدىك سالاسى جەتەكشىسى ۆان مينگشەنگە جانە شىڭجاڭنىڭ قاۋىپسىزدىگىن باقىلاعان بۇرىنعى جەتەكشىسى حۋو لۋچيۋنعا قۇراما شتاتتارعا ۆيزا بەرىلمەيدى. ولاردىڭ اقش-تاعى مال-مۇلكى قاماۋعا قويىلادى.

پرەزيدەنت دونالد ترامپ قىتايدىڭ شىڭجاڭ-ۇيعىر اۆتونومدى ايماعىنداعى مۇسىلمانداردىڭ قۋعىندالۋىنا بايلانىستى جوعارعى قىزمەتتەگى شەنەۋنىكتەرگە سانكتسيا سالۋعا مۇمكىندىك بەرەتىن زاڭ جوباسىنا قول قويعان.

حالىقارالىق قۇقىق قورعاۋ ۇيىمدارى مەن بىرقاتار باتىس ەلدەرى قىتاي بيلىگى شىڭجاڭداعى ۇيعىر، قازاق جانە قىرعىز سياقتى يسلام ءدىنىن ۇستاناتىنىن ەتنوستىق توپتاردى "ساياسي تاربيە لاگەرلەرىنە" نەگىزسىز قاماپ وتىرعانىن ايتىپ كەلەدى. وسىعان دەيىن قىتايدان كەلگەن ونداعان قازاق جانە قىرعىز شىڭجاڭداعى تۋىستارى لاگەرلەردە قامالىپ جاتقانىن ايتىپ، بيلىكتەن كومەك سۇراعان.

قىتاي بيلىگى شىڭجاڭ تۇرعىندارى ءدىني جانە ساياسي كوزقاراسى ءۇشىن قۋعىندالىپ جاتقانىن تەرىسكە شىعارىپ، لاگەرلەر تەك جاڭا كاسىپكە ۇيرەتۋ ورتالىعى دەپ كەلەدى.

Abai.kz

2 پىكىر