بۇگىن ءماجىلىس سپيكەرى نۇرلان نىعماتۋليننىڭ توراعالىعىمەن جالپى وتىرىس ءوتتى. وندا دەپۋتاتتاردىڭ وزدەرى باستاماشى بولعان اۋىلدى ساپالى ينتەرنەتپەن قامتۋ تۋرالى زاڭ جوباسى ءبىرىنشى وقىلىمدا ماقۇلداندى.

اتالعان زاڭ جوباسىندا ەلدى مەكەندەردى ۇيالى بايلانىسپەن قامتىپ، جەلىنىڭ ساپاسىن ارتتىرۋ ءۇشىن بايلانىس وپەراتورلارىنا تەلەكوممۋنيكاتسيالىق ينفراقۇرىلىمدى بىرلەسىپ پايدالانۋ ۇسىنىلادى.

وسى جونىندە ءماجىلىس توراعاسى نۇرلان نىعماتۋلين:

-ەلىمىزدىڭ تسيفرلىق دامۋ جولىندا ينتەرنەت ماسەلەسىنىڭ باستى نازاردا ەكەنىن وزدەرىڭىز جاقسى بىلەسىزدەر. اسىرەسە، اۋىلدى جەرلەردى ساپالى ينتەرنەتپەن قامتاماسىز ەتۋ بۇگىنگى كۇننىڭ باستى تالابى. سەبەبى، مەملەكەت باسشىسى قاسىم-جومارت كەمەلۇلى توقاەۆ ۇلتتىق قوعامدىق كەڭەس وتىرىسىندا ءبىلىم جانە دەنساۋلىق سالالارىن  زامانعا ساي رەفورمالاۋ تۋرالى ايتقان بولاتىن. وسى جولدا، ارينە، تسيفرلىق جانە ەلەكتروندىق قىزمەتتەردىڭ قاجەتتىلىگى وتە ماڭىزدى، - دەدى.

نۇرلان نىعماتۋلين اتاپ وتكەندەي، وسى زاڭ جوباسى اۋىل تۇرعىندارىن ساپالى جانە قولجەتىمدى ينتەرنەتپەن قامتاماسىز ەتۋگە جاڭا سەرپىن بەرەتىنى ءسوزسىز.

جالپى بۇل قۇجات اۋىلدىق ەلدى مەكەندەردى  ينتەرنەتكە كەڭجولاقتى قولجەتىمدىلىكپەن قامتاماسىز ەتۋ ماقساتىندا ازىرلەنگەن.

سونىمەن قاتار، بايلانىس وبەكتىلەرىن سالۋ كەزىندە جەر ۋچاسكەلەرىن رەسىمدەۋ بويىنشا رۇقسات بەرۋ راسىمدەرىن وڭايلاتۋعا جانە بايلانىس وپەراتورلارىنىڭ بارلىعىنا تەلەكوممۋنيكاتسيالىق ينفراقۇرىلىمعا تەڭ قول جەتكىزۋ مۇمكىندىگىن بەرۋگە باعىتتالعان.

اقپاراتتى ءماجىلىس اپپاراتىنىڭ ءباسپاسوز قىزمەتى تاراتتى

Abai.kz