تۇركىستان وبلىسىنداعى اۋىلداردى تاعى دا سۋ باستى. 13 مامىردا تۇركىستان وبلىسىندا تولاسسىز جاۋعان جاڭبىر مەن سۋ دەڭگەيىنىڭ كوتەرىلۋىنەن ونشاقتى ءۇي سۋ استىندا قالدى. بۇل تۋرالى ءىىم تجك رەسمي وكىلى حابارلادى.

ال «Tengrinews.kz» مالىمەتىنشە، تولە بي اۋدانى، ەكپىندى اۋىلىنداعى قاراسۋ وزەنى ارناسىنان تاسىپ، 4 ءۇي مەن 15 اۋلانى سۋ باسقان. جوعارعى اۋىلىندا 4 اۆتوموبيل كوپىرى قيراعان.

شىمكەنت ماڭىنداعى سۇلتان رابات اۋىلىندا دا سۋ دەڭگەيى كوتەرىلگەن، جولداردى سۋ باسقان. بۇل تۋرالى كۋاگەرلەر الەۋمەتتىك جەلىلەردە حابارلاپ جاتىر. لەڭگىردە دە سۋ تاسقىنى بولعانى ايتىلادى. قازىعۇرت اۋدانى، جىگەر اۋىلدىق وكرۋگىندە دە ۇيلەردى سۋ باسقان.

(سۋرەت Tengrinews.kz سايتىنان الىندى)

شىمكەنت قالاسى اكىمدىگىنىڭ اقپاراتىنا سۇيەنسەك، كەشە شىمكەنت قالاسى، ەڭبەكشى اۋدانى، ەلتاي ەلدى مەكەنىنە قاتتى جاۋىن-شاشىن سالدارىنان تۇركىستان وبلىسى، تولە بي اۋدانىنان سەكۋندىنا 3-5 تەكشە مەتر سۋ كەلگەنى تۋرالى حابارلاما كەلىپ تۇسكەن.

(سۋرەت شىمكەنت قالاسى اكىمدىگىنىڭ سايتىنان الىندى)

ۇيلەردىڭ اۋلالارىن سۋ باسىپ، سۋدىڭ دەڭگەيى 20-50 سم قۇراعان. جالپى 60 ءۇيدىڭ اۋلاسىن سۋ باسقان جانە 3 شارۋاشىلىق قۇرىلىسى قيراپتى.

«اۆاريالىق-قۇتقارۋ جۇمىستارىن جۇرگىزۋ ءۇشىن شىمكەنت قالاسى تج دەپارتامەنتىنىڭ 57 قىزمەتكەرى، 14 تەحنيكا مەن مپ-100 ماركالى 14 موتوپومپا جۇمىلدىرىلدى.

(سۋرەت شىمكەنت قالاسى اكىمدىگىنىڭ سايتىنان الىندى)

سۋ باسقان 60 ۇيدەن ادامداردى كوشىرۋ ۇيىمداستىرىلدى. ماياتاس تۇرعىن كەشەنىندە ورنالاسقان №119 مەكتەپتىڭ نەگىزىندە قۇرىلعان №41 ەۆاكۋاتسيالىق جينالۋ پۋنكتىنە 150 ادام كوشىرىلدى، 150 ادام وزدەرىننىڭ تۋىستارىنىڭ ۇيىنە ورنالاستى. زارداپ شەككەندەر مەن قايتىس بولعاندار جوق. قوسىمشا 4 ەۆاكۋاتسيالىق-جينالۋ پۋنكتى دايىندىققا كەلتىرىلدى»، - دەلىنگەن رەسمي حابارلامادا.

(سۋرەت Tengrinews.kz سايتىنان الىندى)

14 مامىر كۇنى تۇنگى ساعات 01:14-تە ەڭبەكشى اۋدانى، وتكورم.سوۆحوزى، گاۋحار تاس كوشەسىندە قاتتى جاۋىن-شاشىن سالدارىنان بادام وزەنى ارناسىنان تاسىعان. جاعالاۋدىڭ بۇزىلۋى سالدارىنان 2 تۇرعىن ءۇي قۇلاي جازداعان. تجد وكىلدەرى قاۋىپتى دەلىنگەن 2 ۇيدەن 17 ادامدى ەۆاكۋاتسيالاپ، بادام-1 ەلدى مەكەنىندەگى №84 ورتا مەكتەبىندە ورنالاسقان ەۆاكۋاتسيالىق پۋنكتكە جەتكىزگەن.

سونىمەن قاتار 112 كەزەكشىلىك قىزمەتىنە ازاماتتاردان ۇيلەردىڭ اۋلالارىن سۋ باسقانى تۋرالى 28 قوڭىراۋ ءتۇسىپتى.

«قازىرگى تاڭدا قاۋىپسىزدىكتى ساقتاۋ ماقساتىندا قۇزىرلى مەكەمەلەر تاراپىنان قاجەتتى كومەك كورسەتىلۋدە. جاعداي تۇراقتى باقىلاۋدا»، - دەلىنگەن رەسمي حابارلامادا.

Abai.kz