تۇركىستان وبلىسىنىڭ ەلدى مەكەندەرىن سۋ باسۋعا قاتىستى وزبەك تاراپىنا قر سىرتقى ىستەر مينيسترلىگىنىڭ نوتاسىن جولداۋ ماسەلەسى قاراستىرىلمايدى. بۇل تۋرالى قر ءسىم-ءنىڭ رەسمي وكىلى ايبەك سمادياروۆ ايتتى، - دەپ حابارلايدى قازاقپارات.

«وزبەكستان رەسپۋبليكاسى اۋماعىنداعى ساردوبا سۋ قويماسى بوگەتىنىڭ بۇزىلۋى جانە ونىڭ سالدارىنان تۇركىستان وبلىسىنىڭ بىرقاتار ەلدى مەكەندەرىن سۋ باسۋ بويىنشا جاعداي ءبىزدىڭ ۇكىمەتتىڭ ەرەكشە باقىلاۋىندا.

ۇستىمىزدەگى جىلعى 2 مامىردا قازاقستان پرەزيدەنتى قاسىم-جومارت توقاەۆ وزبەكستان پرەزيدەنتى شاۆكات ميرزيوەۆپەن تەلەفون ارقىلى سويلەسكەنى جانە سۇحبات بارىسىندا تاراپتار ورىن العان جاعدايدى ناقتى تالقىلاپ، ەكى ەل ۇكىمەتى ۇيلەسىمدى جۇمىس اتقاراتىنى تۋرالى ۋاعدالاسقانى ءمالىم.

سۋ باسۋ سالدارىن بىرلەسىپ جويۋ بويىنشا ۇكىمەت پەن شەكارالاس وڭىرلەر باسشىلارىنىڭ تىعىز ءوزارا ءىس-قيمىلىن نازارعا الا وتىرىپ، وزبەك تاراپىنا قر سىرتقى ىستەر مينيسترلىگىنىڭ نوتاسىن جولداۋ ماسەلەسى قاراستىرىلمايدى»، - دەدى ا.سمادياروۆ.

رەسمي وكىلدىڭ ايتۋىنشا، تۇركىستان وبلىسىنىڭ اكىمى ومىرزاق شوكەەۆ وزبەكستاننىڭ كورشىلەس وڭىرلەرىنە جەدەل تۇردە ساپار جاساعان. وزبەك تاراپىمەن قاجەتتى كەلىسسوزدەر جۇرگىزىپ، ونىڭ قورىتىندىلارى تۋرالى ۇكىمەتتىڭ بۇگىنگى وتىرىسىندا باياندادى.

«وزدەرىڭىزگە ءمالىم، پرەمەر-ءمينيستردىڭ ورىنباسارى رومان سكليار باستاعان ۇكىمەتتىك كوميسسيا قۇرىلدى. ەرتەڭ ول تۇركىستان وبلىسى مەن وزبەكستانعا بىرلەسكەن ءىس-قيمىل الگوريتمىن پىسىقتاۋ ءۇشىن بارادى.

ەسكە سالايىق، وزبەكستاندا بوگەتتىڭ جارىلۋىنان تۇركىستان وبلىسىنىڭ بىرنەشە ەلدى مەكەنىن سۋ باستى. 31 مىڭنان استام تۇرعىن ەۆاكۋاتسيالاندى. اتقارىلعان جۇمىستاردان كەيىن سۋ باسۋ قاۋپى سەيىلگەن مىرزاكەنت، اقجول اۋىلدارىنىڭ 17 مىڭنان استام تۇرعىنى ۇيلەرىنە قايتا باستادى.

ايتا كەتەيىك، بۇعان دەيىن ەكولوگيا، گەولوگيا جانە تابيعي رەسۋرستار ۆيتسە-ءمينيسترى سەرگەي گروموۆ قازاقستان وزبەكستانعا نارازىلىق نوتاسىن دايىنداپ جاتقانى ايتقان بولاتىن. 

Abai.kz