قر پرەمەر-ءمينيسترى اسقار ءماميننىڭ توراعالىعىمەن قر پرەزيدەنتى جانىنداعى توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيانىڭ كەزەكتى وتىرىسى ءوتتى. 

كارانتين جاعدايلارىندا وڭىرلەردە شەكتەۋ شارالارىن كەزەڭ-كەزەڭىمەن جەڭىلدەتۋ، سونداي-اق نۇر-سۇلتان جانە الماتى قالالارىنىڭ اراسىنداعى اۋە رەيستەرىن قالپىنا كەلتىرۋ تۋرالى مەملەكەت باسشىسىنىڭ تاپسىرماسىن ىسكە اسىرۋ شارالارىنا قاتىستى پرەمەر-ءمينيستردىڭ ورىنباسارى ەرالى توعجانوۆ، يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ، دەنساۋلىق ساقتاۋ ءمينيسترى ەلجان ءبىرتانوۆ باياندادى.

ۇكىمەت باسشىسى قر پرەزيدەنتى قاسىم-جومارت توقاەۆتىڭ تاپسىرماسىن ىسكە اسىرۋ اياسىندا مەملەكەتتىك كوميسسيانىڭ بىرقاتار شەشىمدەردى قابىلداعانىن اتاپ ءوتتى:

1. بارلىق وڭىرلەردە 2020 جىلعى 27 ساۋىردەن، ال شىمكەنت قالاسىندا بيىلعى 1 مامىردان باستاپ قاتاڭ سانيتارلىق-ەپيدەميولوگيالىق تالاپتاردى ساقتاۋمەن جۇمىسقا كىرىسەتىن كاسىپكەرلىك سۋبەكتىلەرىنىڭ قىزمەت تۇرلەرىنىڭ ءتىزىمى بەكىتىلدى: 

- ونەركاسىپتىك كاسىپورىندار;

- قۇرىلىس جانە جول قۇرىلىسى سالالارىنىڭ كومپانيالارى، ءىرى قۇرىلىس دۇكەندەرى;

- كولىك، قويمالاۋ، اۋىل شارۋاشىلىعى ماقساتىنداعى سەرۆيستىك، اۆتوكولىكتەرگە قىزمەت كورسەتۋ سالالارىنداعى ۇيىمدار جانە قىزمەت كورسەتۋ سالاسىنىڭ كەيبىر تۇرلەرى;

- بانكتەر مەن قارجى سەكتورىنىڭ ۇيىمدارى.

ءىى كەزەڭ اياسىندا نۇر-سۇلتان قالاسىندا تومەندەگىلەردىڭ جۇمىسى قايتا جاندانادى:

- قارجى جانە ساقتاندىرۋ سەكتورلارىنىڭ ۇيىمدارى;

- ەلەكترلىك تۇرمىستىق تەحنيكا، سونىمەن قاتار ساياجاي ماۋسىمىنا ارنالعان تاۋارلار ساتاتىن ءىرى دۇكەندەر.

الماتىدا مىنا سالالارداعى كومپانيالار جۇمىسىن قايتا باستايدى:

- كولىك جانە قويمالاۋ، اقپاراتتىق-كوممۋنيكاتسيالىق تەحنولوگيالار سالالارى;

- قارجى جانە ساقتاندىرۋ سەكتورلارى;

- سەرۆيستىك قىزمەت كورسەتۋ سالالارى (تقس، دوڭگەلەك اۋىستىرۋ، تۇرمىستىق جانە كەڭسە تەحنيكالارىن جوندەۋ)

2. وبلىستاردىڭ، سونداي-اق نۇر-سۇلتان، الماتى جانە شىمكەنت قالالارىنىڭ اكىمدەرىنە بيىلعى 27 ساۋىردەن باستاپ وڭىرلىك شتابتار ازىرلەگەن ەرەجەلەرگە سايكەس اۋلا الاڭدارى مەن ساياجاي القاپتارىنىڭ حالىققا قولجەتىمدىلىگىن قامتاماسىز ەتۋ تاپسىرىلدى.

3. 2020 جىلعى 1 مامىردان باستاپ نۇر-سۇلتان مەن الماتى اراسىنداعى اۋە قاتىناسىن قايتا جانداندىرۋ تۋرالى شەشىم قابىلداندى. باستاپقى كەزەڭدە ۇشۋ جيىلىگى كۇنىنە 4 رەيستى قۇرايدى. رەيستەر كۇشەيتىلگەن سانيتارلىق تالاپتاردى ساقتاپ، از جولاۋشىلارمەن جانە سالوندا ەرەكشە قاشىقتىقتى ساقتاۋ ارقىلى جۇزەگە اسىرىلادى.

«اكىمدەرگە قوعامدىق ورىنداردى، ونەركاسىپتىك اۋماقتاردى، اۋەجايلار مەن بالالاردىڭ اۋلاداعى ويىن الاڭدارىن ساپالى تۇردە سانيتارلىق وڭدەۋگە، جالپى، سانيتارلىق-ەپيدەميولوگيالىق تالاپتاردى قاتاڭ ساقتاپ، وعان باقىلاۋ ورناتۋعا ەرەكشە كوڭىل ءبولۋدى تاپسىرامىن»، — دەدى ا. مامين.  

سونىمەن قاتار، وتىرىسقا قاتىسۋشىلار قازاقستاندىقتاردى شەت ەلدەردەن ەلگە جەتكىزۋ، حقكو-لار جۇمىسىنىڭ جاڭا فورماتىن ەنگىزۋ جانە ت. ب. ماسەلەلەردى قاراستىردى.

Abai.kz