14 ساۋىردە قازاقستان سپورتىنا ۇلكەن ەڭبەك سىڭىرگەن بەلگىلى ازامات بەكەت ساپابەكۇلى ماحمۇتوۆ ومىردەن ءوتتى. 

قازاقستان پرەزيدەنتى قاسىم-جومارت توقاەۆ داڭقتى باپكەردىڭ دۇنيەدەن وتۋىنە بايلانىستى ونىڭ وتباسىنا جانە جاقىن تۋىستارىنا كوڭىل ايتۋ جەدەلحاتىن جولدادى.

«بەكەت ساپابەكۇلى ۇزاق جىلدار بويى ەلىمىزدە سپورت سالاسىن وركەندەتۋ جولىندا ەسەلى ەڭبەك ەتىپ، قۇرمەتكە بولەنگەن ەدى. اسىرەسە، قازاق سپورتىن جوعارى دەڭگەيگە كوتەرگەن بىلىكتى باپكەر رەتىندە ەسىمى ەل تاريحىندا قالاتىنى انىق.

سالماقتى دا سابىرلى مىنەزىمەن ءوز ورتاسىنا سىيلى بولدى. مارقۇمنىڭ جانى ءجانناتتا، يمانى سالامات بولسىن»، – دەلىنگەن جەدەلحاتتا.

سوڭىندا مەملەكەت باسشىسى ونىڭ ەسىمى مەن جارقىن بەينەسى حالقىمىزدىڭ جۇرەگىندە ماڭگى ساقتالاتىنىنا سەنىم ءبىلدىردى.

بەكەت ماحمۇتوۆ 1939 جىلى الماتى وبلىسىندا دۇنيەگە كەلگەن. ءومىرىنىڭ باسىم بولىگىن بوكس جانە دزيۋدو سپورتىنىڭ دامۋىنا ارنادى. 1993-2000 جىلداردا ەلىمىزدىڭ بوكس فەدەراتسياسىنا جەتەكشىلىك ەتتى. بۇل كەزەڭدە قازاقستاندىق بىلعارى قولعاپ شەبەرلەرى ءۇش وليمپيادادا تۇراقتى تۇردە جۇلدەگەرلەر قاتارىنان كورىندى. 1996 جىلى 1 التىن، 1 كۇمىس، 2 قولا، 2000 جىلى 2 التىن، 2 كۇمىس مەدال الدى. ول 1996-2006 جىلداردا حالىقارالىق بوكس فەدەراتسياسىندا (AIBA) ۆيتسە-پرەزيدەنت قىزمەتىن اتقاردى.

سونداي-اق، ول 2009 جىلدان باستاپ ەلىمىزدىڭ دزيۋدو فەدەراتسياسىنا جەتەكشىلىك جاساپ، ونى جوعارى دەڭگەيگە كوتەرۋگە كۇش سالدى.

ناتيجەسىندە 2009 جىلى ماكسيم راكوۆ الەم چەمپيونى اتاندى. 2010 جىلى ەلدوس سمەتوۆ جاستار اراسىندا سول بيىكتەن كورىنىپ، كەيىننەن ەرەسەكتەر اراسىندا الەم چەمپيونى جانە وليمپيادا جۇلدەگەرى بولدى.

Abai.kz