قر دەنساۋلىق ساقتاۋ ءمينيسترى ەلجان ءبىرتانوۆ ەلىمىزدە قابىلدانعان كارانتيندىك شارالاردىڭ وڭ ناتيجە بەرگەنىن اتاپ ءوتتى. مينيستر بۇل تۋرالى facebook پاراقشاسىندا جازعان. 

«ەلىمىزدە قابىلدانعان قاتاڭ كارانتيندىك شارالار 28 ناۋرىز بەن كەشەگى تاۋلىكتى ەسەپتەگەندە كوروناۆيرۋس ينفەكتسياسىنىڭ تارالۋ قارقىنىن 52-دەن 12 پايىزعا دەيىن تومەندەتۋگە مۇمكىندىك بەردى. بۇل وزگەرىس بىزگە سانيتارلىق جانە مەديتسينالىق قىزمەتتەردىڭ جۇمىس اۋىرتپالىعىن ازايتىپ، ناۋقاستار مەن بايلانىسقان ادامدارعا ءتيىمدى كومەك كورسەتۋگە مۇمكىندىك بەرەدى»، - دەدى مينيستر.

ءبىرتانوۆتىڭ ايتۋىنشا، دەگەنمەن ساقتىق شارالارىن ءالى دە كۇشەيتۋ كەرەك. سەبەبى، ءساۋىر ايىنىڭ العاشقى جارتىسىندا ۆيرۋستىڭ تارالۋى ۇدەي تۇسپەك.

«وسى كەزەڭدە ءبىز شامامەن 3500 جاعداي تىركەلەتىنىن (قازىر 551) بولجايمىز. ودان ارى، ياعني جاز ايلارىندا ەپيدەميولوگتار ەپيدەميا تولىعىمەن توقتاماسا دا باياۋلايتىنىن كۇتەدى. كەيبىر ساراپشى بيىلعى كۇزدە ىندەتتىڭ قايتالاناتىن جوققا شىعارمايدى»، - دەدى.

ءمينيستردىڭ مالىمەتىنشە، ەلىمىزگە بۇگىنگى تاڭدا كوروناۆيرۋستان ناۋقاستاردى ەمدەۋ ماقساتىندا 3920 ينفەكتسيالىق،7300 پروۆيزورلىق توسەك ورىن دايىندالعان. ودان بولەك 180 اۋىر ناۋقاستى قابىلداۋعا قابىلەتتى جانساقتاۋ بولىمشەسى ءازىر ەكەنىن، وندا 170 جاساندى تىنىس الۋ اپپاراتى، قان وكسيگەناتسياسىنىڭ ەكستراكورپورالدى مەمبرانانالى 38 اپپاراتى بارىن ايتتى.

«الايدا پاتسيەنتتەر جۇقپالى اۋرۋلار اۋرۋحاناسىندا ورتاشا ەسەپپەن 3-4 اپتا وتكىزەتىنىن، ەلدى مەكەندەردىڭ تىرشىلىگىن قامتاماسىز ەتۋمەن اينالىساتىن كاسىپورىندار مەن قىزمەتتەردىڭ كوماندالارىندا - مەديتسينا قىزمەتكەرلەرى، پوليتسيا، قارۋلى كۇشتەردە ينفەكتسيانىڭ پايدا بولۋ قاۋپىن ەسكەرگەندە قازاقستاندا ازىرگە كوبىرەك توسەك ورىن مەن ارنايى اۋرۋحانا كەرەكتىگى بايقالادى. سونىمەن قاتار ول اۋرۋحانالار ينفەكتسيالىق قاۋىپسىزدىكتىڭ بارلىق تالابىنا ساي بولۋى كەرەك. وندا بوكستالعان پالاتالار، ۆەنتيلياتسيانىڭ ەرەكشە جۇيەسى، جانساقتاۋ بولىمىندەگى ورىندار بولۋى ءتيىس. مۇنداي تەز تۇرعىزىلاتىن ەمحانالاردىڭ قىتايدا قالاي پايداعا جاراعانىن كوردىك. اقش پەن يتاليا، وزگە دە ەۋروپالىق ەلدەردەگى قاراپايىم ەمحانالارعا قانداي جۇكتەمە ءتۇسىپ وتىرعانىنان دا حاباردارمىز. كوپتەگەن ەل ناۋقاستار مەن مەديتسينالىق پەرسونالدار ءۇشىن ينفەكتسيالىق قاۋىپسىزدىك تەحنولوگيالارى ساقتالماعان نىساندار مەن سپورتتىق قۇرىلىمداردى پايدالانۋعا ءماجبۇر», - دەدى دەنساۋلىق ساقتاۋ ءمينيسترى.

Abai.kz