3 ساۋىردە قاشىقتان وقۋ ماسەلەسىن تالقىلاعان ءبىلىم جانە عىلىم ۆيتسە-ءمينيسترى رۇستەم بيعاري جانە "قازپوشتا" باسقارما توراعاسى ساكەن سارسەنوۆ ءوزارا مەموراندۋمعا قول قويىپ، وسىلاي كەلىسكەن. بۇل تۋرالى رەسمي باق حابارلادى. دەرەك بويىنشا، قازاقستاندا ينتەرنەت ارقىلى وقۋعا مۇمكىندىگى جوق 20 مىڭنان استام وقۋشى بار.

مەكتەپ وقۋشىلارىنىڭ دەرەكتەرى جەرگىلىكتى ءبىلىم باسقارمالارىنا بەرىلىپ، وقۋشىلار "قازپوشتا" بولىمدەرى ارقىلى وقۋ ماتەريالدارىن الادى. قىزمەت كورسەتۋ تەگىن بولادى دەپ ايتىلادى.

"قازپوشتا" وقۋ ماتەريالدارى مەن وقۋشىلاردىڭ تاپسىرمالارىن ۋاقىتىندا جەتكىزىپ وتىرۋ مىندەتىن العان.

قازاقستاندا 6 ساۋىردەن باستاپ مەكتەپ وقۋشىلارى قاشىقتان وقي باستايدى. بۇعان دەيىن بىرقاتار اتا-انالار شالعايداعى اۋىلداردا ينتەرنەت جىلدامدىعى باياۋ ەكەنىن، كەيبىر وتباسىلاردىڭ ينتەرنەتكە قوسىلماعانىن ايتىپ، ماسەلەگە ۋايىمداعان ەدى.

اقپارات جانە قوعامدىق دامۋ ءمينيسترى داۋرەن اباەۆ 26 ناۋرىزدا ونلاين وتكىزىلەتىن ساباق 30 مينۋتقا سوزىلادى دەگەن. وقۋشىلارعا بەرىلەتىن قوسىمشا ۆيدەوساباقتار جەرگىلىكتى تەلەارنالار ارقىلى كورسەتىلەدى. بيلىكتىڭ ايتۋىنشا، قازىر وسىنداي 200 ۆيدەوساباق دايىن. تاعى 2000-عا جۋىق ءونىم ازىرلەنەدى.

16 ناۋرىزدان باستاپ قازاقستاندا جوعارى وقۋ ورىندارى، كوللەدج ستۋدەنتتەرى دە قاشىقتان وقۋعا كىرىسكەن.بۇعان دەيىن ءبىلىم جانە عىلىم ءمينيسترى اسحات ايماعامبەتوۆ قازاقستاندىق جوعارى وقۋ ورىندارىنىڭ 30 پايىزى قاشىقتان وقۋعا دەيىن ەكەنىن مالىمدەگەن.

Abai.kz