ەلىمىزدە تاعى ءۇش ادامنان كوروناۆيرۋس انىقتالدى. ولار الماتىدا. بۇل تۋرالى قر دسم قىزمەت، تاۋارلاردىڭ ساپاسى مەن قاۋىپسىزدىگىن باقىلاۋ كوميتەتى مالىمدەدى.

"2020 جىلدىڭ 17 ناۋرىزىنداعى، ساعات 09:00 بويىنشا كوروناۆيرۋسكە قاتىستى ەپيدەميولوگيالىق جاعداي تۋرالى. الماتىدا تاعى ءۇش ادامنان كوروناۆيرۋس ينفەكتسياسى انىقتالدى", دەلىنگەن حابارلامادا.

ءبىرىنشى ادام - 2018 جىلى تۋعان قىز بالا. ول 13 ناۋرىز كۇنى بەرلين-مينسك-الماتى رەيسىمەن ۇشىپ كەلگەن. قازىر الماتىدا بالالار جۇقپالى اۋرۋلار اۋرۋحاناسىندا.

ەكىنشى ادام - 1966 جىلى تۋعان ەر ادام. ول 10 ناۋرىز كۇنى ماسكەۋدەن ۇشىپ كەلگەن.

ءۇشىنشى ادام - 1956 جىلى تۋعان ەر ادام. ول دا ماسكەۋدەن ۇشىپ كەلگەن.

قاۋىپتى ۆيرۋس قازىرگى تاڭدا قازاقستان اۋماعىندا 13 ادامنان انىقتالدى. ولاردىڭ 11-ءى الماتىدا، 2-ەۋى نۇر-سۇلتاندا.

كوروناۆيرۋس بەلگىلەرى انىقتالعان تاعى ءبىر قازاقستاندىق گەرمانيادا ەمدەلىپ جاتىر.

Abai.kz