دەنساۋلىق ساقتاۋ ءمينيسترى ەلجان ءبىرتانوۆ وزگە ەلدەردەن كەلەتىن جولاۋشىلاردى قازاقستانعا كىرگىزۋدى شەكتەۋ شارالارىنا بايلانىستى پىكىر ءبىلدىردى.

«شەكتەۋ بولۋى ءتيىس. كوپتەگەن ەل شەكتەۋدى ەنگىزەدى. 4 ناۋرىزدا ءبىرىنشى ساناتتاعى ەلدەردەن كەلگەن شەتەل ازاماتتارى ءۇشىن شەكتەۋلەر ەنگىزىلدى. جولاۋشىلار اعىنىن قىسقارتۋ ءۇشىن وسىنداي نورمالار كۇشىنە ەندى. وكىنىشكە قاراي، ءبىزدىڭ ازاماتتارىمىز ەسكەرتۋ مەن قاۋىپ-قاتەرگە قاراماي، باسقا ەلدەرگە، اسىرەسە ءبىرىنشى ساناتتاعى ەلدەرگە شىعۋلارىن قويار ەمەس. اسىرەسە، ءبىزدىڭ ازاماتتار كوپ باراتىن وڭتۇستىك كورەيانى ەرەكشە اتاپ وتكىم كەلەدى. اۋرۋ كەڭ تارالىپ كەلە جاتقاندىقتان بىرتىندەپ شەكتەۋ شارالارىن ەنگىزۋدەمىز. سوندىقتان ءبىز العاشقى كۇندەردەن باستاپ ازاماتتارىمىزدى بۇل ەلدەرگە بارماۋعا شاقىردىق. ءبىزدى بيزنەسكە كەدەرگى كەلتىردى دەگەن سىڭايدا سىنعا الدى. بىراق بۇل ۇسىنىستار ازاماتتارىمىزدى قورعاۋعا باعىتتالعان»، - دەدى ەلجان ءبىرتانوۆ وكق-دا وتكەن ءباسپاسوز كونفەرەنتسياسىندا.

ءمينيستردىڭ ايتۋىنشا، ەسكەرتۋگە قاراماستان كەتىپ قالعان ازاماتتار ەلگە كەلگەن كەزدە شەكتەۋ شارالارىنا دايىن بولۋى ءتيىس.

«بۇل دەنساۋلىق ساقتاۋ كودەكسىنە سايكەس زاڭدى قادام. وسى ستاندارتتاردى بۇزعانى ءۇشىن جاۋاپكەرشىلىك تە قاراستىرىلعان. شەكتەۋلەر ەنگىزىلگەنىمەن ءبىز ءاردايىم باسقا ەلدەردىڭ اۋە كومپانيالارىنا ىقپال ەتە المايمىز. سوندىقتان حالىقتى قورعاۋ ماقساتىندا بىزگە كەلىپ جاتقان ازاماتتاردى دەپورتاتسيالاۋعا دەيىنگى ارەكەتتى جاساۋعا، جەر اۋدارۋدى جۇزەگە اسىرۋعا قۇقىعىمىز بار. اتاپ ايتقاندا، 4-ءى كۇنى ءباا-دەن بورت كەلدى. وندا قحر-دىڭ ەكى ازاماتى بار بولىپ شىقتى. ءبىز ولاردى وقشاۋلاپ، باقىلاپ، قىتايعا جىبەردىك. باسقا ەلدەر دە وسىنداي شارالاردى قابىلداۋدا. بۇل ۇيلەسىمدى ساياسات»، - دەدى مينيستر.

وسىعان بايلانىستى دەنساۋلىق ساقتاۋ مينيسترلىگى قوسىمشا شارالاردى قابىلداماق.

«جاپونيادان كەلگەن جولاۋشىلاردىڭ جاعدايى تۋرالى بىلەسىزدەر. ولاردىڭ جاعدايى تۇراقتى، جاقىن ارادا ەمحانادان شىعارىلادى. سونىمەن قاتار بۇگىن وڭتۇستىك كورەيادان بورت كەلەدى. ءبىز ولاردى دا كارانتينگە ورنالاستىرامىز. ءبىزدىڭ كلينيكالاردىڭ دايىندىعى جاقسى. ورنالاستىرامىز، تەكسەرەمىز. ەگەر ناۋقاستار بولسا، ولاردى مامانداندىرىلعان اۋرۋحانالارعا جاتقىزامىز. بىزدە ازاماتتار ءۇشىن تاماقپەن قامتاماسىز ەتەتىن جانە سانيتارلىق نورمالارعا ساي كەلەتىن ورىندار جەتكىلىكتى. كارانتينگە جاتقىزعان ازاماتتار اۋرۋ ادامدار ەمەس. ولار دەنى ساۋ ادامدار»، - دەپ سەندىردى ەلجان ءبىرتانوۆ.

Abai.kz