كورەيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى پاۆلودار وبلىسىنىڭ اكىمى ابىلقايىر سقاقوۆپەن كەزدەستى. ولار قازىر جۇزەگە اسىرىلىپ جاتقان جوبالار مەن ءوزارا ىنتىماقتاستىق پەرسپەكتيۆالارىن تالقىلادى. 

ابىلقايىر سقاقوۆ وڭىردە وڭتۇستىك كورەيانىڭ جوعارى تەحنولوگيالار مەن عىلىم سالاسىنداعى تاجىريبەسىن زەردەلەۋگە مۇددەلى ەكەندىگىن اتاپ ءوتتى.  

- پاۆلودار وبلىسىنىڭ رەسۋرستارىن ءوسىم نۇكتەلەرىن قۇرۋ الەۋەتى رەتىندە قولدانۋعا بولادى، - دەدى ابىلقايىر سقاقوۆ. – ينۆەستيتسيالاردى تارتۋ - ءبىز ءۇشىن ءبىرىنشى كەزەكتەگى ماسەلە. ول ءۇشىن بىزدە قاجەتتى ينفاقۇرىلىم مەن باسقارۋ ينستيتۋتتارى بار، قارجىلاندىرۋ سەكتورلارى دا جەتەرلىك. 

توتەنشە جانە وكىلەتتى ەلشى وڭتۇستىك كورەيالىق كومپانيالار ءۇشىن ونەركاسىبى دامىعان پاۆلوداپ وبلىسىمەن جۇمىس ىستەۋ اسا تارتىمدى ەكەندىگىن جەتكىزدى. سونىمەن قاتار، كيم دە-سيك فەرروسيليتسي وندىرەتىن زاۋىتتىڭ قۇرىلىسىمەن اينالىساتىن قازاقستاندىق «Mineral Product» جشس-ءى مەن وڭتۇستىك كورەيانىڭ Sac Holding كومپانياسىنىڭ بىرلەسكەن جوباسى تۋرالى ەسكە سالدى. قازىر بۇل جوبا بويىنشا تەحنيكالىق-ەكونوميكالىق نەگىزدەمەنى  ازىرلەنىپ جاتىر.       

- وتكەن جىلى باستاعان ارىپتەستىگىمىز جالعاسىن تاپسا دەيمىز، - دەدى ەلشى. – ءبىزدىڭ كومپانيالارىمىز اگروونەركاسىپتىك كەشەنى سالاسىندا ارەكەتتەسۋگە دايىن. قازىرگى كەزدە «اقىلدى فەرمەرلىك» باعىتى جاقسى دامىعان. وسى باعىتتا جۇمىس ىستەۋگە بولادى. مەن پاۆلودار وبلىسىنىڭ مۇمكىندىكتەرى مەن ەرەكشەلىكتەرىن تىزبەلەپ جازىپ الىپ، ولار تۋرالى مىندەتتى تۇردە وڭتۇستىك كورەيالىق كومپانيالاردىڭ وكىلدەرىنە حابارلايتىن بولامىن. 

تاراپتار مەديتسينا مەن ءبىلىم بەرۋ سالاسىنداعى ارىپتەستىك ماسەلەلەرىن دە تالقىلادى. ابىلقايىر سقاقوۆ وڭتۇستىك كورەيا ماماندارىنىڭ وسى سالالارداعى باي تاجىريبەسىن پاۆلودار وبلىسىندا قولدانۋعا بولاتىنىن اتاپ ءوتتى. 

Abai.kz