جەكسەنبى, 5 شىلدە 2020
COVID-19 قازاقستاندا. جۇقتىرعاندار — 41065. جازىلعاندار — 13614. قايتىس بولعاندار — 188
634 1 پىكىر 29 قاڭتار, 2020 ساعات 10:43

ترامپ تاياۋ شىعىستى رەتتەۋ جونىندەگى جوسپارىن جاريالادى

اقش پرەزيدەنتى دونالد ترامپ ۇزاق ۋاقىتتان بەرى ۋادە ەتكەن تاياۋ شىعىستى رەتتەۋ جونىندەگى جوسپارىمەن تانىستىردى. ول يەرۋساليمدى ءيزرايلدىڭ "بولىنبەيتىن" استاناسى رەتىندە ساقتاپ قالۋعا ۋادە ەتتى. ال شىعىس يەرۋساليم ترامپتىڭ ويىنشا، پالەستينا استاناسى بولۋى ءتيىس.

اق ۇيدە يزرايل پرەمەر-ءمينيسترى بينيامين نەتانياحۋدىڭ قاتىسۋىمەن سويلەگەن كوزىندە اقش پرەزيدەنتى ونىڭ بەيبىت جوسپارى پالەستيندىقتار ءۇشىن "سوڭعى مۇمكىندىك" بولۋى مۇمكىن دەدى.

BBC تەلەكانالىنىڭ حابارلاۋىنشا، بۇل جوسپار قۇپيا تۇردە ترامپتىڭ قىزى يۆانكانىڭ كۇيەۋى دجارەد كۋشنەردىڭ قاداعالاۋىمەن جازىلعان.

ترامپ ءوزىنىڭ 80 بەتتىك جوسپارىن جان-جاقتى قاراستىرىلعان تولىق جوبا دەپ اتاپ ءوتتى.

"بۇگىن يزرايل بەيبىتشىلىككە قاراي ۇلكەن قادام جاساپ جاتىر. يەرۋساليم ءيزرايلدىڭ بولىنبەس استاناسى بولىپ قالادى. الەم ورتاق شەشىمدى قاجەت ەتەدى. ءبىز يزرايلدەن ەشقاشان قاۋىپسىزدىك ماسەلەسىندە مامىلەگە كەلۋدى سۇرامايمىز",- دەدى اقش پرەزيدەنتى.

ترامپتىڭ ايتۋىنشا، ول پالەستينا اۆتونومياسىنىڭ توراعاسى ماحمۋد ابباسقا حات جولداعان. "مەن وعان پالەستينا مەملەكەتىنە تيەسىلى تەرريتوريا ءتورت جىل بويى قازىرگى جاعدايدا قالا بەرەتىنىن، وسى ۋاقىت ىشىندە وزگەرىستەرگە دايىندىق جاساۋ ءۇشىن پايدالانۋ قاجەتتىگىن ايتتىم. پالەستيندىقتاردىڭ ءوزىنىڭ مەملەكەتى بولۋى قاجەت", - دەيدى ترامپ.

تاياۋ شىعىس تەز وزگەرىپ جاتىر، ءبىز بولاشاق ۇرپاق قامىن ويلاۋىمىز كەرەك دەگەن ترامپ "يسلام مەملەكەتى" تولىق جويىلعانىن، ونىڭ ليدەرى ءال-باعداديدىڭ ولتىرىلگەنىن ايتتى.

"يسلام الەمىنە 1948 جىلى جاساعان قاتەسىن تۇزەتىپ، ءيزرايلدى مويىنداۋى كەرەك. ۋاقىت كەلدى", - دەدى ترامپ.

ترامپ ومان، باحرەين مەن بىرىككەن اراب امىرلىگىن بەيبىت جوسپارىن قولداعانى ءۇشىن ريزاشىلىعىن جەتكىزدى.

يزرايل پرەمەرى بينيامين نەتانياحۋ ءسوز الىپ، جوبانى دايىنداۋشىلارعا العىسىن ءبىلدىردى.

نەتانياحۋ ترامپ مالىمدەمە جاساعان 28 قاڭتاردى "ۇلى كۇن" دەپ سانايتىنىن، ول 1948 جىلدىڭ 14 مامىرىن دا "ۇلى كۇن" رەتىندە ەسكە الىپ، سول كەزدەگى اقش پرەزيدەنتى گارري ترۋمەن ءيزرايلدى تاۋەلسىز مەملەكەت رەتىندە مويىنداعان ەدى دەدى.

يزرايل پرەمەرى وسى ۋاقىتقا دەيىنگى تاياۋ شىعىستى رەتتەۋ جوبالارىنىڭ بىردە ءبىرىنىڭ جۇزەگە اسپاۋى تاراپتاردىڭ مۇددەلەرىن ويلاماۋىنان دەپ ءتۇسىندىردى.

يزرايلدە، اقش جانە ەۋروپالىق مەملەكەتتەردە تەرروريستىك ۇيىم دەپ تانىلعان حاماس توبى اق ۇيدەگى ترامپ مالىمدەمەسىن تەرىسكە شىعاردى. سەيسەنبى كۇنى مىڭداعان پالەستيندىك بۇل جوباعا قارسى نارازىلىق بىلدىرگەن.

Abai.kz

1 پىكىر