ولار «سەنiپ تاپسىرىلعان اسا ءىرى كولەمدەگى بوتەننىڭ مۇلكىن يەمدەنiپ الۋ نەمەسە تالان-تاراجعا سالۋ» بابى بويىنشا ايىپتالىپ جاتىر. سوتتالۋشىلار ايىپپەن كەلىسپەيدى.

ايىپتاۋ اكتىسى بويىنشا، شكارۋپا ساران قالاسى اكىمى قىزمەتىن اتقارعان تۇستا نابيەۆپەن بىرگە قالاداعى تۇرعىن ۇيلەرگە جىلۋ ەسەپتەۋگە ارنالعان اسپاپتاردى ورناتۋ ءۇشىن تۇرعىن ءۇي-كوممۋنالدىق شارۋاشىلىعىن دامىتۋ قورىنان قاراجات قاراستىرىلماعانىن، ساراننىڭ ورتالىق جىلۋ قازاندىعى قۇرىلىسى اياقتاۋ مۇمكىن ەمەس ەكەنىن بىلە تۇرا قىلمىستىق جوسپار قۇرعان. ويلاعان ارەكەتتى ىسكە اسىرۋ ءۇشىن ولار ءۇشىنشى ادام – قوردىڭ باسقارما توراعاسى قايسار بايدالىنى تارتقان. بايدالى جۇمىس ىستەمەيتىن «ساران جىلۋ قىزمەتى» كاسىپورنىنا زاڭسىز قارجى اۋدارعان.

پروكۋرور وقىعان ايىپتاۋدا تۇرعىن ءۇي-كوممۋنالدىق شارۋاشىلىعىن دامىتۋ قورىنان جۇمىس ىستەمەيتىن «ساران جىلۋ قىزمەتى» كومپانياسى 274 جىلۋ ەسەپتەۋ قوندىرعىسىن جەتكىزۋدى ۇيىمداستىرعانى ءۇشىن «ENERCO» كومپانياسىنىڭ ەسەبىنە 215 ميلليون 90 مىڭ تەڭگە قاراجات اۋدارىلعانى ايتىلادى. 2015 جىلدىڭ جەلتوقسانىندا ەرلان نابيەۆ جىلۋ ولشەۋ قۇرىلعىلارىن «ساران جىلۋ قىزمەتى» كاسىپورنىنا جەتكىزىپ بەرەدى. بىراق وسى قارجىنىڭ ءبىر بولىگى، 104 ميلليون 427 مىڭ 234 تەڭگە قولدى بولىپ، قوردىڭ قىزمەتىنە اسا ءىرى كولەمدەگى شىعىن اكەلگەن.

ءۇش ايىپتالۋشى دا اكتىمەن كەلىسپەي، ونى «ابسۋرد» ءھام ويدان شىعارىلعان دەپ اتادى. ولاردىڭ ادۆوكاتى ايتىلعان «ايىپتاۋ كوپ سۇراق تۋدىردى ءارى تەرگەۋدىڭ اشىقتىعىنا كۇمانىم بار» دەيدى. بۇعان دەيىن سوتتالۋشىلار قىلمىستىق قۋدالاۋدى توقتاتۋدى سۇراعان. ولار سوت جاقىندا قاراعاندى وبلىسى اكىمىنىڭ ساراننىڭ ورتالىق جىلۋ قازاندىعى قۇرىلىس اياقتالعانى جونىندەگى پىكىرىن ەسەپكە الۋى كەرەك دەپ سانايدى. ايىپتالۋشىلاردىڭ ايتۋىنشا، بۇل ورناتىلعان جىلۋ ەسەپتەۋ اسپاپتارىن قوسىپ، پايدالانۋعا بەرۋگە بولادى.

اناتولي شكارۋپا ساران قالاسىنىڭ اكىمى (2014-2017) قىزمەتىنەن كەيىن قاراعاندى وبلىسى اكىمىنىڭ ەنەرگەتيكا، تۇرعى ءۇي-كوممۋنالدىق شارۋاشىلىق جانە توتەنشە جاعدايلار ماسەلەلەرى بويىنشا ورىنباسارى بولىپ ىستەگەن. 2018 جىلى قازاندا قازاقستان ەنەرگەتيكا ءمينيسترىنىڭ ورىنباسارى بولىپ تاعايىندالعان اناتولي شكارۋپا سول جىلى قاراشادا تۇتقىندالعان.

Abai.kz