19-20 جەلتوقسان ارالىعىندا دۋشانبەدە تاجىكستانداعى قازاقستاندىق
مەديتسينا كۇندەرى وتەدى.

بۇل ءىس-شارانىڭ ماقساتى - قازاقستان مەن تاجىكستاننىڭ دەنساۋلىق
ساقتاۋ جۇيەلەرىنىڭ اراسىنداعى ارىپتەستىكتى كۇشەيتۋ، مەديتسينالىق
ۇيىمداردىڭ ءوزارا ارەكەتتەستىگىن نىعايتۋ، ەكى ەل ازاماتتارىنا كورسەتىلەتىن
مەديتسينالىق كومەك ساپاسىنىڭ قولجەتىمدىلىگىن قامتاماسىز ەتۋ ماقساتىندا
تاجىريبە جانە ءبىلىم، سونداي-اق يننوۆاتسيالارمەن جانە تەحنولوگيالارمەن
الماسۋ.

قر دەنساۋلىق ساقتاۋ ۆيتسە-ءمينيسترى ولجاس امانگەلدىۇلى ابىشەۆ
باستاپ بارعان قازاقستاندىق دەلەگاتسيانىڭ قۇرامىندا 30-دان استام جەتەكشى
مەديتسينالىق كلينيكالار، بەيىندى مەديتسينالىق ۇيىمدار، فارماتسەۆتيكالىق
وندىرۋشىلەر، مەديتسينالىق جوو-لار، قازاقستاننىڭ دەنساۋلىق ساقتاۋ
سالاسىنداعى كونسالتينگ كومپانيالار جانە ءىت وكىلدەرى بار.
ا.ن. سىزعانوۆ اتىنداعى ۇلتتىق عىلىمي حيرۋرگيا ورتالىعىن
اتالمىش ۇيىمنىڭ جەتەكشى ماماندارى تانىستىردى. ورتالىق دەلەگاتسياسىن
باسقارما توراعاسى بايماحانوۆ بولاتبەك بيمەندەۇلى باستاپ باردى.
فورۋمنىڭ جوعارى سەسسياسىندا بايماحانوۆ بولاتبەك بيمەندەۇلى
«قازاقستان رەسپۋبليكاسىنداعى ورگاندىق ترانسپلانتاتسيا» تاقىرىبىندا
بايانداما جاسادى.

وسى ءىس-شارانىڭ اياسىندا ا.ن. سىزعانوۆ اتىنداعى ۇلتتىق عىلىمي
حيرۋرگيا ورتالىعى تاجىكستان رەسپۋبليكاسىنىڭ ۇلتتىق عىلىمي اعزالاردى
جانە تىندەردى ترانسپلانتاتسيالاۋ ورتالىعىمەن سەرىكتەستىك تۋرالى
مەموراندۋم بەكىتتى.

فورۋمنىڭ ەكىنشى كۇنى بىرنەشە شەبەرلىك ساباقتارى وتكىزىلەدى دەپ
جوسپارلانىپ وتىر.

ورتالىقتىڭ جوعارى ساناتتى دارىگەرلەرى تاجىكستاندىق ارىپتەستەرمەن
بىرگە تۋىستىق باۋىر ترانسپلانتاتسياسىن، مەحانيكالىق سارى اۋرۋ سيندرومى
كەزىندەگى ەندوسكوپيالىق ارالاسۋلاردى، سونداي-اق اريتميانىڭ ءتۇرلى
فورمالارى كەزىندەگى ەندوۆاسكۋليارلىق وتالاردى جاسايتىن بولادى.

Abai.kz