مەملەكەت باسشىسى قاسىم-جومارت توقاەۆ كاتار ورتالىق بانكىنىڭ توراعاسى ابداللا ءال تاني باستاعان ءىرى قارجى قۇرىلىمدارىنىڭ باسشىلارىمەن كەزدەستى. كەزدەسۋ بارىسىندا قارجى سالاسىنداعى ءوزارا ءىس-قيمىلدار، ينۆەستيتسيا تارتۋ جانە «استانا» حالىقارالىق قارجى ورتالىعى اياسىنداعى ماسەلەلەر تالقىلاندى.

قازاقستان پرەزيدەنتى كاتار دەلەگاتسياسىنىڭ وسى ساپارى ءوزارا ىنتىماقتاستىقتى دامىتۋعا تىڭ سەرپىن بەرۋى ءتيىس ەكەنىن اتاپ ءوتتى.

– بيىلعى ماۋسىم ايىندا دۋشانبەدە كاتار امىرىمەن كەزدەستىم. سول كەزدە ءبىز ەكى مەملەكەت اراسىندا دانەكەر بولاتىن ناقتى ءىس-قيمىلداردى كۇشەيتۋ جونىندە ۋاعدالاستىق. مەن ونى قازاقستان استاناسىنا رەسمي ساپارمەن كەلۋگە شاقىردىم. وسىعان بايلانىستى سىزدەردىڭ ساپارلارىڭىزدىڭ ءبىز ءۇشىن ماڭىزى اسا زور دەپ ويلايمىن، – دەدى مەملەكەت باسشىسى.

كاتار ورتالىق بانكىنىڭ توراعاسى ابداللا ءال تاني ءوز ەلىنىڭ باسشىلىعىنىڭ پرەزيدەنتكە، ۇكىمەتكە جانە قازاقستان حالقىنا جولداعان سالەمىن جەتكىزدى.

– ەكى ەل اراسىنداعى قارىم-قاتىناستاردىڭ جوعارى دەڭگەيدە دامىپ كەلە جاتقانىن بىلەسىزدەر. ءبىزدىڭ ساپارىمىز وسى ۇردىسكە قولداۋ كورسەتۋ بولىپ سانالادى. ەلدەرىمىزدىڭ قارجىلىق قۇرىلىمدارى اراسىندا تەرەڭ ءارى تىعىز بايلانىستار ورناعان. ءبىز ءبىر-بىرىمىزبەن بانك، قارجى جانە ينۆەستيتسيا باعىتتارى بويىنشا ىقپالداستىق جاساپ كەلەمىز. كەشە «استانا» حالىقارالىق قارجى ورتالىعىنىڭ بازاسىندا كاتارداعى ىرى بانكتەردىڭ ءبىرىنىڭ فيليالىن اشۋ جونىندە ۋاعدالاستىق، – دەدى كاتار قارجىگەرى.

سونىمەن قاتار ول ەكى ەل اراسىنداعى تىكەلەي اۋە قاتىناسىنىڭ تەزىرەك اشىلۋى ساۋدا-ەكونوميكالىق جانە ينۆەستيتسيالىق ىنتىماقتاستىقتى نىعايتا تۇسەدى دەگەن پىكىر ايتتى.

دەلەگاتسيا قۇرامىندا كاتار قور بيرجاسىنىڭ باسقارما توراعاسى راشيد ءال-مانسۋري، «Masraf Al Rayan» بانكتەر توبىنىڭ توراعاسى حۋسەين ءال-ابداللا، «Qatar International Islamic Bank» بانكىنىڭ باسقارما توراعاسى ابدۋل باسيت ءال-شايبي، Qatar National Bank» بانكىنىڭ باسقارما توراعاسىنىڭ مىندەتىن اتقارۋشى ابدۋللا ءال-حاليفا، كاتار قارجى ورتالىعىنىڭ رەتتەۋشى ۆەدومستۆوسىنىڭ باسقارما توراعاسى مايكل رايان، «Commercial Bank of Qatar» بانكتەر توبىنىڭ باسقارما مۇشەسى موحاماد مانداني ءال-ەمادي جانە كاتاردىڭ قازاقستانداعى ەلشىسى ابدۋلازيز ءال-رۋمەيحي بولدى.

Abai.kz