«الماتى» تەلەارناسىنا 20 جىل. ايتۋلى مەرەكە 23 قاراشا كۇنى ساعات 16.00-دە «مەدەۋ» مۇز ايدىنىندا وتەدى.

كەشتە تانىمال ەسترادا جۇلدىزدارى الىشەر كارىموۆ، بۇركىت پەن ايشا، سيۆيەتتا ماحمۋدي، بەيبىت كوشقاليەۆ، سەرىكبول سايلاۋبەك اننەن شاشۋ شاشىپ، ەڭ ۇزدىك اندەرىن تارتۋ ەتەدى.

ال «Q-pop»، «CrystalZ»، «وtty»، «MalikaYes»، «MayBo» جانە «بۇيرا» توپتارى دا بۇرىن-سوڭدى ەش جەردە ورىندالماعان جاڭا اندەرىنىڭ تۇساۋىن كەسەدى. «الماتى» تەلەارناسىن قۇتتىقتاۋ ءۇشىن قازاقستاننىڭ بەلگىلى مادەنيەت جانە سپورت قايراتكەرلەرى ارنايى كەلەدى.

كەش قوناقتارى الماتى قالاسى مەن تەلەارنا تاريحىنا نەگىزدەلگەن قىزىقتى ۇتىس ويىندارىنا قاتىسىپ، جەڭىمپازدار باعالى سىيلىقتارمەن ماراپاتتالادى.

ۋاقىتتى ۇنەمدەۋ ءۇشىن، بيلەتتەردى ticketon.kz نەمەسە kassir.kz  ونلاين كاسساسىنان ساتىپ الۋعا بولادى.

تاريحى 1999 جىلدان باستاۋ الاتىن «الماتى» ارناسى بۇگىندە ەلىمىزدىڭ بارلىق وڭىرلەرىن قامتىعان. تەلەارنا تسيفرلىق جۇيەمەن حابار تاراتادى.  "وتاۋ تۆ" سپۋتنيكتىك تەلەديدارى ارقىلى ءبىزدى قازاقستاننىڭ كەز كەلگەن بۇرىشىنان كورۋگە بولادى. حابار تاراتۋدىڭ ورتاشا تاۋلىكتىك ۋاقىتى – 19 ساعات، ونىڭ 55%-ى مەملەكەتتىك تىلدە جۇزەگە اسىرىلادى. تەلەارنانىڭ  نۇر-سۇلتان قالاسىندا تىلشىلەر قوسىنى بار.

ودان بولەك، وڭتۇستىك قازاقستان، اقتوبە، قاراعاندى، قوستاناي جانە سولتۇستىك قازاقستان وبلىستارىنداعى سەرىكتەستەرىمەن تىعىز بايلانىس ورناتقان.

«الماتى» ارناسى كينو سۇيەر قاۋىمعا شىتىرمان وقيعالى فيلمدەردى، ماحاببات مەلودرامالارىن، قىزىقتى كومەديالىق تەلەحيكايالاردى ۇسىنىپ كەلەدى.  ال، جەكسەنبى كۇندەرى زاماناۋي ۇزدىك  تۋىندىلارمەن قوسا التىن قوردان الىنعان كلاسسيكالىق كينوفيلمدەردى كورە الادى.  مەرەكە كۇندەرى تىكەلەي ەفير ارقىلى ويىن-ساۋىق شارالار مەن كونتسەرتتەر كورسەتىلىپ، كورەرمەن كوڭىلىن اۋلايدى.

بۇگىندە "الماتى" تەلەارناسى قالا تۇرعىندارىن تولعاندىرعان وزەكتى ماسەلەلەرگە ءمان بەرىپ، شەشىمىن بىرگە تابۋعا بارىن سالۋدا.

Abai.kz