سەنبى, 7 جەلتوقسان 2019
1368 1 پىكىر 31 تامىز, 2019 ساعات 16:23

قىزىلوردا وبلىسىنىڭ اكىمى وڭىردەگى مەكتەپ-ينتەرناتقا ەكى اۆتوكولىك سىيلادى

30-تامىز كۇنى قىزىلوردا وبلىسىنىڭ اكىمى قۋانىش ىسقاقوۆ وڭىردەگى ءجالاڭتوس ءباھادۇر اتىنداعى مەكتەپ-ينتەرنات ۇجىمىمەن كەزدەسىپ، ۇستازدار مەن ستۋدەنتتەردى كەلە جاتقان ءبىلىم كۇنىمەن قۇتتىقتادى. سونىمەن قاتار، ايماق باسشىسى اتالعان ءبىلىم ورداسىنا ەكى اۆتوكولىكتىڭ كىلتىن تابىستادى. 

العاش رەت 2001 جىلى اشىلعان اتالعان سپورت مەكتەبى بۇگىنگى كۇنگە دەيىن تالاي بالانىڭ سپورتقا قۇمارلىعىن ارتتىرىپ، دارىندى بالالاردى تاربيەلەپ شىعاردى. ال، بۇل مەكتەپكە داڭقتى باتىر ءجالاڭتوس ءباھادۇردىڭ ەسىمىنىڭ بەرىلۋى دە تەگىن ەمەس. ءوڭىر باسىشىسى بۇل ءبىلىم عيماراتىنىڭ ماڭىزى تۋرالى ايتىپ، تاريحىنا توقتالىپ ءوتتى.

-مەكتەپ-ينتەرنات ءوزىنىڭ ءوسۋ-وركەندەۋ جولىندا بۇگىنگى تاۋەلسىز ەلدىڭ بەلگىلى سپورتشىلارىن وقىتاتىن، تاربيەلەيتىن كوللەدج دارەجەسىنە دەيىن كوتەرىلدى. مەكتەپ ينتەرناتتان ەسىمدەرى ەلگە تانىمال الەم، ازيا چەمپيوندارى مەن وليمپيادا جۇلدەگەرلەرى تۇلەپ شىقتى. ولار: اۋىر اتلەتيكادان وليمپيادا ويىندارىنىڭ قولا جۇلدەگەرى الەكساندر زايچيكوۆ، وليمپيادا ويىندارىنىڭ قاتىسۋشىلارى، الەم چەمپيوناتىنىڭ كۇمىس جۇلدەگەرى الماس وتەشوۆ، ەركىن كۇرەستەن 3 دۇركىن ازيا چەمپيونى داۋلەت نيازبەكوۆ، دزيۋدودان جاسوسپىرىمدەر وليمپيادا ويىندارىنىڭ چەمپيونى، تۇڭعىش الەم چەمپيونى باۋىرجان جاۋىنتاەۆ، ەركىن كۇرەستەن وليمپيادا ويىندارىنىڭ قاتىسۋشىسى عالىمجان وسەرباەۆ، اۋىر اتلەتيكادان الەم چەمپيوناتىنىڭ قاتىسۋشىسى قۋانىش راحاتوۆ سىندى سپورتشىلاردى ماقتانىشپەن ايتا الامىز. جەتىستىكتەرگە كەلسەك، 2018-2019 وقۋ جىلىندا مەكتەپ-ينتەرنات وقۋشىلارى رەسپۋبليكا چەمپيوناتتارىندا 111 مەدال يەلەندى. بيىلعى جىلى 5 قازاقستان رەسپۋبليكاسىنىڭ سپورت شەبەرى، 40 سپورت شەبەرلىگىنە ۇمىتكەرلەر دايىندالىپ، ۇلتتىق قۇراما كوماندا ساپىنا 32 وقۋشى ەندى، - دەدى وبلىس اكىمى.

سونىمەن قاتار، وسى جىلى قازاقستان رەسپۋبليكاسىنىڭ ءىح جازعى مەكتەپ جانە كوللەدج وقۋشىلارى اراسىنداعى سپارتاكيادادا مەكتەپ – ينتەرنات – كوللەدج وقۋشىلارى سپورت تۇرلەرىنەن 57 مەدالعا قول جەتكىزدى. 2018 جىلى ارگەنتينانىڭ بۋەنوس-ايرەس قالاسىندا وتكەن ءىىى جازعى جاسوسپىرىمدەر وليمپيادا ويىندارىندا مەكتەپ-ينتەرنات وقۋشىسى بايداركا جانە كانوەدە ەسۋدەن دياس باحرادين التىن جۇلدەنى جەڭىپ الدى. سونىمەن قاتار، اقش-تىڭ لاس-ۆەگاس قالاسىندا اۋىر اتلەتيكادان جاسوسپىرىمدەر اراسىندا وتكەن الەم چەمپيوناتىندا ءساپي ەسەنگەلدى مەن بەكبولات راحات جەڭىمپاز اتاندى.
قۋانىشبەك ىسقاقوۆ مەكتەپ-ينتەرنات باسشىلىعىنا ەكى اۆتوكولىكتىڭ كىلتىن تابىستاپ، جوندەلگەن عيماراتتاردى قاراپ شىقتى.

ءبىلىم ورداسىندا «سپورت جاتتىقتىرۋشىسى-وقىتۋشى» ماماندىعى بويىنشا 40 ستۋدەنت ءبىلىم الۋمەن قاتار سپورتتىق شەبەرلىكتەرىن شىڭداۋدا.

بۇگىنگى تاڭدا وقۋشىلاردىڭ ءبىلىم الۋى مەن سپورتپەن شۇعىلدانۋىنا قولايلى جاعداي جاساۋ ماقساتىندا مەكتەپ-ينتەرنات-كوللەدجگە، ياعني جاتاقحانا، اسحانا، وقۋ ورتالىعى مەن اكىمشىلىك بولىمىنە كۇردەلى جوندەۋ جۇمىستارى جۇرگىزىلدى.

Abai.kz

1 پىكىر