قازا تاپقان قىرعىز ازاماتتارىنىڭ تۋىستارى سوت شەشىمىمەن كەلىسپەيدى
ماسكەۋدە باسپاحانادان شىققان ءورت كەزىندە قازا تاپقان قىرعىزستاندىقتاردىڭ تۋىستارى سوت شەشىمىنە قارسى شاعىمدانباقشى. ولار كاسىپورىننىڭ جەتەكشىلەرىنە "جۇمساق" جازا شىعاردى دەيدى. قىرعىزستاننىڭ رەسەيدەگى ەلشىلىكتىڭ حابارلاۋىنشا، قازىرگى ۋاقىتتا ادۆوكات قايعىلى وقيعا قۇرباندارىنىڭ تۋىستارىنا وتەماقى تولەۋ جونىندە قارسى شاعىم ازىرلەپ جاتىر.
18 تامىزدا ماسكەۋدىڭ بۋتىرسك اۋداندىق سوتى باسپا ديرەكتورى سەرگەي موسكۆيندى ءورت قاۋىپسىزدىگى ەرەجەسىن بۇزدى دەگەن ايىپپەن 2,5 جىلعا باس بوستاندىعىنان ايىردى.
باسپانىڭ باس ينجەنەرى 3,5 جىلعا سوتتالدى.
2016 جىلدىڭ تامىز ايىندا باسپادان شىققان ورتتەن 14 قىرعىز ازاماتى جانە ءۇش رەسەيلىك قازا تاپقان. قايتىس بولعانداردىڭ ءبارى ايەلدەر. ونىڭ ىشىندە بىرەۋىنىڭ اياعى اۋىر بولعان.
تەرگەۋ ءىسى جەتى ايعا سوزىلعان. وسىعان دەيىن "پەچاتنىي ەكسپرەسس" باسپاسى مەن ونىڭ باس ديرەكتورى 6 ملن رۋبل كولەمىندە ايىپپۇل تولەيتىنى ايتىلعان. بىراق بۇل تالاپ ءارى ورىندالماعان.
Abai.kz
