«قازاق حاندىعى» سەريالىنا وزگە ەلدەردەن قىزىعۋشىلىق ءبىلدىرىپ جاتىر.

امەريكالىق جۋرناليست دجواننا ليلليس Eurasianet.org سايتىندا جاريالاعان ماتەريالىندا قازاق سەريالىن ايگىلى «تاقتار ويىنىنا» تەڭەگەن. اۆتور جازباسىندا «قازاق حاندىعى» الەمدەگى ەڭ تانىمال تەلەجوبالاردىڭ ءبىرى — «تاقتار ويىنىنا» باسەكە بولا الاتىنىن جازعان، سونداي-اق اۆتور قازاقستاندىق سەريالدىڭ سيۋجەتى عانا ەمەس، ۆيزۋالدىق ەستەتيكاسىنىڭ دا تارتىمدى ەكەنىن اتاپ وتكەن. بۇل تۋرالى Today.kz جازدى.

ال قر مادەنيەت جانە سپورت مينيسترلىگى تاراتقان اقپاراتقا سايكەس، «قازاق حاندىعى» سەريالىنا قىتاي تەلەارنالارى قىزىعۋشىلىق تانىتىپ وتىر. ازىرگە ناقتى ەشتەڭە ايتىلمايدى، بىراق قىتاي تەلەارنالارىنىڭ بىرىنە ساتۋ تۋرالى كەلىسسوزدەر جۇرگىزىلىپ جاتقان كورىنەدى. جالپى بۇل تەلەفيلمگە باسقا ەلدەردەن دە قىزىعۋشىلىق بار ەكەن، سول سەبەپتى سەريال قازاقشا تۇسىرىلسە دە، كەيىن ورىس، تۇرىك جانە اعىلشىن تىلدەرىنە دۋبلياجدالاتىن بولادى.

قازاق مەملەكەتتىگىنىڭ 550 جىلدىعىنا ارنالعان «قازاق حاندىعى» سەريالىنىڭ ءتۇسىرىلىمى 2015 جىلى كۇزدە باستالدى. كارتينا رەجيسسەرى — رۇستەم ابدiراشەۆ، باستى رولدەرگە ەلىمىزدىڭ كوپتەگەن تانىمال اكتەرلەرى قاتىسىپ جاتىر. پرەمەراسى 2016 جىلدىڭ ناۋرىز ايىنا جوسپارلانعان. دەۆالۆاتسياعا بايلانىستى فيلم ءتۇسىرىلىمى ءبىراز قيىندىققا ۇشىراپ، اكتەرلەر گونورارىن الا الماي جۇرگەندىگى جايلى جازعان بولاتىنبىز. قارجى تاپشىلىعىنا بايلانىستى، حالىقتان كومەك سۇراپ، كراۋدفاندينگ جۇيەسىمەن اقشا جينالاتىنى دا حابارلاندى. Qazaqeli550.kz سايتىنداعى اقپاراتقا سەنسەك، قازىر 100 ميلليون تەڭگەدەن استام جىلۋ جينالعان.

دەرەككوزى: baistars.kz

Abai.kz