الەۋمەتتىك جەلىلەردە شقو-نىڭ زايسان اۋدانىندا ءبىر توپ ادام كوروناۆيرۋس جۇقتىردى دەگەن مالىمەت تارادى. بۇل ماسەلەگە قاتىستى شىعىس قازاقستان وبلىسىنىڭ اكىمى دانيال احمەتوۆ زايسان اۋدانىنىڭ تۇرعىندارىمەن كەزدەسۋگە كەلدى. 

دالىرەك ايتقاندا، زايسان اۋدانى سارىتەرەك اۋىلىنىڭ تۇرعىندارى كەشە، 19 اقپاندا ساعات 15:00-دە نارازىلىقپەن اۋىلدىق امبۋلاتوريانىڭ الدىنا جينالعانى ايتىلعان. وعان سەنسەك، قىتايمەن شەكارادان بۇگىن، 20 اقپاندا كوروناۆيرۋس جۇقتىردى دەگەن ادامداردى اۋىل امبۋلاتورياسىندا ەمدەۋ جوسپارلانعان-مىس. تۇرعىندار وسى اقپاراتقا سەنىپ، ءمان-جايدى ءبىلۋ ءۇشىن جينالعان.

زايساننىڭ سارىتەرەك جانە اينابۇلاق اۋىلدارىندا نارازىلىققا شىققان حالىقپەن كەزدەسۋگە وبلىس اكىمى دانيال احمەتوۆ باستاعان شەنەۋنىكتەر كەلگەنمەن، اۋدان حالقى ءتۇسىندىرۋ جۇمىستارى بولماعانىن ايتىپ، سەنىمسىزدىك ءبىلدىرىپ، شەكارادان بەلگىسىز ازاماتتاردىڭ وتكەنىن العا تارتادى.

- شەكارادان ەشقانداي وزگە ەلدىڭ ازاماتتارى وتكەن جوق. بىراق شەكارانىڭ ارعى جاعىندا 5 زايساندىق ازامات تۇر. ولاردىڭ دەنساۋلىعىن 14 كۇن باقىلاۋ ءۇشىن وسكەمەنگە الىپ كەتەمىز. ال مۇنداعى 42 قىتاي ازاماتىن ۇكىمەتباسىمەن اقىلداسىپ، ءوز ەلىنە جىبەرۋ شاراسىن شەشەمىز، تەك 3 كۇن ۋاقىت بەرىڭىزدەر! - دەدى دانيال احمەتوۆ.

وعان كونبەگەن ءبىر توپ حالىق وبلىس باسشىلىعىمەن بىرگە «سين-سين» كومپانياسىنىڭ جۇمىسكەرلەرى تۇراقتاعان 9-بازاسىنا كەلىپ، تولقۇجاتتارىن ءوز كوزدەرىمەن كورگەن.

ال، اتالعان ماسەلەگە قاتىستى شقو اكىمدىگى احمەتوۆتىڭ  حالىقپەن كەزدەسۋىنىڭ قورىتىندىسى تۋرالى قوسىمشا اقپارات بەرەتىنىن مالىمدەدى.

Abai.kz