ەل تۇرعىندارىن قولجەتىمدى باسپانامەن قامتۋ قىزمەتى قارقىندى ءجۇرىپ جاتقانىنا كوپ ۋاقىت بولدى. ەل ۇكىمەتى ارنايى باعدارلامالار قابىلداپ، ازاماتتاردىڭ باسپانالى بولۋى ءۇشىن بار جاعدايدى جاساپ وتىر دەۋگە مۇمكىندىك بار. اسىرەسە قيىنشىلىعى بار وتباسىلار مەن كوپبالالى وتباسىلارعا مەملەكەت تاراپىنان جاسالاتىن ارنايى جەڭىلدىكتەر بار.

وتكەن جىلى تۇڭعىش پرەزيدەنت، ەلباسى نۇرسۇلتان نازارباەۆ ەلدەگى كوپبالالى انالاردى باسپانامەن قامتاماسىز ەتۋ تۋرالى تاپسىرما بەرگەن بولاتىن. وسى تاپسىرما بەرىلگەن كۇننەن بەرى ءار وبلىس، اۋداندا قونىس تويىن تويلاعاندار سانى ارتىپ كەلەدى. بۇل تۇرعىدا بيلىكپەن قاتار جەرگىلىكتى بيزنەسمەندەردىڭ دە پايداسى ۇشان-تەڭىز بولدى.

اتاپ ايتار بولساق، جاقىندا عانا الماتى وبلىسىندا تۇراتىن مەتسەناتتار بولات ءابىلوۆ پەن وراز جاندوسوۆ قاپشاعاي قالاسىندا وتىز بىردەي وتباسىنا سۋ تەگىن پاتەر سىيلادى. وسى اقجولتاي حابار باسپانالى بولۋدى ارمانداپ جۇرگەن قانشاما كوپبالالى انالاردىڭ توبەسىن كوككە جەتكىزدى. وسى جولى باسپانالى بولعاندار قاتارىندا كوپبالالى وتباسىلار، مۇگەدەك جاندارمەن قاتار، جەتىم بالالار دا بار ەكەن.

مەتسەناتتار سىيلاعان باسپانا سەرتيفيكاتتارىن الماتى وبلىسىنىڭ اكىمى اماندىق باتالوۆ ءوزى كەلىپ، ارنايى تابىستادى. اماندىق باتالوۆ وسى كۇنى باسپانالى بولعان ازاماتتاردى قۇتتىقتاي وتىرىپ، الماتى وبلىسىندا ازاماتتاردى باسپانامەن قامتاماسىز ەتۋ ءۇشىن وتە اۋقىمدى قىزمەتتەر اتقارلىپ جاتقانىن جەتكىزدى. ءارى بۇل جۇمىستا مەملەكەتتىك باعدارلامالارمەن قاتار وسى ايماقتاعى جەرگىلىكتى مەتسەناتتارىنىڭ ۇلكەن كومەك كورسەتىپ وتىرعانىن دا مالىمدەدى.

-بىلتىر وبلىستا 894 مىڭ شارشى مەتر تۇرعىن ءۇي سالىندى، بۇل 2018 جىلمەن سالىستىرعاندا 25%-عا كوپ كورسەتكىش. حالىقتىڭ از قامتىلعان بولىگى مەن تۇرعىن ءۇي كەزەگىندە تۇرعانداردى قولجەتىمدى باسپانامەن قامتۋدا مەملەكەتپەن قاتار، جەرگىلىكتى مەتسەناتتار دا كوپ كومەك كورسەتۋدە. «نۇرلى جەر»، «7-20-25» جانە «باقىتتى وتباسى» مەمباعدارلامالارىنىڭ ارقاسىندا 2443 وتباسى باسپاناعا قول جەتكىزدى، ولاردىڭ 1779-ى – الەۋمەتتىك از قامتىلعاندار مەن كوپبالالى انالار. ال بۇگىن ءبىز وبلىسىمىزدا ءىرى ينۆەستيتسيالىق جوبالاردى جۇزەگە اسىرىپ جاتقان بيزنەسمەندەردىڭ ءوز قارجىسىمەن كوپبالالى جانۇيالارعا، جەتىم بالارا مەن مۇگەدەك جاندارعا 30 پاتەر ساتىپ الىپ بەرگەنىنە كۋا بولىپ وتىرمىز، – دەدى اماندىق باتالوۆ.

ءبىز ءسوز ەتىپ وتىرعان پاتەرلەر الماتى وبلىسىنداعى «Teniz Towers» تۇرعىن ءۇي كەشەنىنەن بەرىلدى. بۇل پاتەرلەر «7-20-25» باعدارلاماسى بويىنشا سالىنعان بولاتىن. وسى تۇرعىن ۇيلەردى بيزنەسمەندەر وراز جاندوسوۆ پەن بولات ءابىلوۆ باسقاراتىن «Eneverse Kunkuat» جاۋاپكەرشىلىگى شەكتەۋلى سەرىكتەستىك ءوز قاراجاتىنا ساتىپ الىپ، مۇقتاج وتباسىلارعا سىيعا تارتىپ وتىر.

باسپانالى بولعان قاپشاعايلىق تۇرعىنداردىڭ اتىنان كوپبالالى انا سۆەتلانا كەۋلىمجاەۆا مەن «قامقور جۇرەك» قوعامدىق بىرلەستىگىنىڭ توراعاسى ءلاززات سالىقوۆا باسپانا سىيلاعان بيزنەسمەندەر مەن وبلىس باسشىلىعىنا العىس ايتىپ، ريزاشىلىقتارىن ءبىلدىردى. ال وبلىس اكىمدىگى مەن بيزنەسمەندەر باسپانالى بولعان تۇرعىنداردى جاقىندا وتەتىن قونىس تويىمەن قۇتتىقتادى. بۇل قونىس تويى مامىر ايىندا وتەدى. «Teniz Towers» تۇرعىن ءۇي كەشەنىندەگى پاتەرلەردى مامىر ايىندا قولدانىسقا بەرۋ جوسپارلانىپ وتىر.

-مەن «التىن القا» يەگەرى، كوپبالالى انامىن. 2008 جىلدان بەرى مەملەكەتتىك قور ەسەبىنەن تۇرعىن ءۇي كەزەگىندە تۇرمىن. بۇگىن مەن ءۇشىن اسا قۋانىشتى كۇن بولدى. مەنىڭ وتباسىم دا ءۇيلى بولاتىن بولدى. وسى جەردەگى بارلىق كوپبالالى انالاردىڭ اتىنان بارىڭىزگە شەكسىز العىسىمدى بىلدىرەمىن, - دەدى باسپانالى بولعان كوپبالالى انا س. كەۋلىمجاەۆا.

ءسوز سوڭىندا ايتا كەتەرىمىز، وتىز بىردەي وتباسىعا پاتەر سىيلاپ وتىرعان «Eneverse Kunkuat» جاۋاپكەرشىلىگى شەكتەۋلى سەرىكتەستى ءبىراز ۋاقىت بۇرىن قاپشاعايدىڭ ماڭىنان 100 مۆت قۋاتقا يە كۇن ەلەكتر ستانتسياسىن سالعان بولاتىن.

Abai.kz