باتىس قازاقستان وبلىسىنىڭ ورتالىعىندا ورالدا اقپارات جانە قوعامدىق دامۋ مينيسترلىگىنىڭ ۇيىمداستىرۋىمەن «ءدىني ەكسترەميزمنىڭ الدىن الۋ ماسەلەلەرىندەگى جاستاردىڭ ءرولى» اتتى ەكى كۇندىك وقىتۋ سەمينارى ءوتتى، دەپ حابارلايدى «حابار 24».

شارا بارىسىندا ستۋدەنتتەر مەن جوعارعى وقۋ ورىندارىنىڭ ماگيسترانتتارى ەكسترەميزمنىڭ الدىن الۋ، ەرىكتىلەردىڭ قايىرىمدىلىق قوزعالىستارىن ۇيىمداستىرۋ جانە الەۋمەتتىك جەلىلەر رەسۋرستارىن ءتيىمدى پايدالانۋ بويىنشا ءوز سۇراقتارىنا جاۋاپ الدى. وقىتۋ سەمينارى بارىسىندا تاراپتار راديكالدىق يدەولوگيانىڭ تەرىس ىقپالىنان ساقتانۋ، ەكسترەميستىك يدەيالارعا تويتارىس بەرۋ ماسەلەلەرىن تالقىلادى. قازىرگىدەي اقپاراتتار اعىنى ءورشىپ تۇرعان كەزەڭىندە جاستاردىڭ دۇرىس جولدان اداسۋى ءجيى كەزدەسىپ وتىر. «سوندىقتان قاجەتسىز نارسەلەردىڭ ارا-جىگىن اجىراتا ءبىلۋ جاستار ءۇشىن اسا ماڭىزدى»، – دەيدى بلوگەر ياكوۆ فەدوروۆ. ياكوۆ فەدوروۆ، بلوگەر: – سەمينارلاردىڭ ماقساتى –ەكسترەميزمگە قارسى ۆولونتەرلىك قوزعالىس جانە الەۋمەتتىك جەلىلەردەگى جۇمىستاردى دامىتۋ. جانە باسقا كونفەسسيالار وكىلدەرىنە تولەرانتتىق كوزقاراس قۇرۋ. سەمينار ۇيىمداستىرۋشىلارىنىڭ پايىمىنشا، جاستار ەشقانداي دالەلدەنبەگەن قاعيدالارسىز-اق ەرىكتىلەر قوزعالىسىن قۇرۋ ارقىلى قايىرىمدىلىق ىستەرمەن اينالىسا الادى. ەرىكتىلەردىڭ ۇيىمىن قۇرۋدى مەڭگەرۋ، الەۋمەتتىك جەلىلەردى ءتيىمدى پايدالانا ءبىلۋ دە ماڭىزدى مىندەتتەر قاتارىندا.

البينا نۇرباەۆا، ستۋدەنت:

– ءبىزدىڭ ويىمىزدى دامىتۋعا كوپ ۇلەسىن قوسىپ جاتىر. بىزگە كوپتەگەن يدەيالاردى ايتىپ جانە ولاردى قالاي دامىتۋ كەرەكتىگىن، ءدىن جولىندا قالاي تەرىس جولعا كەتپەۋ كەرەكتىگىن ءبارىن ءتۇسىندىرىپ جاتىر، بىزگە بۇل ۇناپ جاتىر. سەبەبى بۇل جەردە ءوزىڭنىڭ دە پىكىرىڭدى بىلدىرۋگە بولادى. ەلىمىزدە «ەكسترەميزمسىز قازاقستان» اتتى رەسپۋبليكالىق اكتسيا جۇمىسىن باستادى. وسى اكتسيا اياسىندا بايقاۋ ۇيىمداستىرىلىپ، ەلوردادا قورىتىندىلانادى.