Citic Construction كاسىپورنىندا زاڭسىز جۇمىس ىستەيتىن شەتەلدىك ازاماتتار تەكسەرىستەن كەيىن دەپورتاتسيالاندى، دەپ حابارلادى "matritca.kz"  سايتى الماتى وبلىستىق سوتىنىڭ ءباسپاسوز قىزمەتىنە سىلتەمە جاساي وتىرىپ.

تالدىقورعان مامانداندىرىلعان اكىمشىلىك سوتى، سونداي-اق اقسۋ اۋداندىق سوتى اكىمشىلىك قۇقىق بۇزۋشىلىق تۋرالى كودەكستىڭ 517-بابىنىڭ 2-بولىگى (شەتەلدىكتەردىڭ نەمەسە ازاماتتىعى جوق ادامداردىڭ حالىقتىڭ كوشى-قونى تۋرالى زاڭنامانى بۇزۋى) بويىنشا 70 قىتاي ازاماتىنا قاتىستى قوزعالعان اكىمشىلىك ءىستى قارادى.

ۆەدومستۆونىڭ حابارلاۋىنشا، 9 قازانداعى سوت شەشىمدەرىمەن قحر-نىڭ بارلىق 70 ازاماتى كىنالى دەپ تانىلىپ، ولارعا ەلدەن شىعارۋ تۇرىندە اكىمشىلىك جازا قولدانىلدى.

سوت اكتىلەرى كۇشىنە ەندى، شەت مەملەكەتتىڭ ازاماتتارى قازاقستان اۋماعىنان شىعارىلدى.

قازان ايىنىڭ باسىندا تالدىقورعان ماڭىندا جول قۇرىلىسىمەن اينالىساتىن كاسىپورىندا شەتەلدىك جۇمىسشىلار مەن جەرگىلىكتى تۇرعىندار اراسىندا جانجال شىققان. Citic Construction كاسىپورنىنىڭ ءبىر توپ جۇمىسشىسى ۆيدەوۇندەۋ جازعان. وندا قحر-نىڭ ءۇش ازاماتى جۇرگىزۋشى – ەتنيكالىق قازاقتى سوققىعا جىققانى ايتىلادى.

پوليتسيانىڭ مالىمەتىنشە، جانجال ءتورت جۇمىسشى – قىتاي ازاماتتارى اراسىندا بولىپ، سوڭى توبەلەسكە ۇلاسقان. توبەلەس سالدارىنان ولاردىڭ ءبىرى – ەتنيكالىق قازاق جاراقات العان. كىنالىلەر اكىمشىلىك قۇقىق بۇزۋشىلىق تۋرالى كودەكسىنىڭ 73-1 بابى بويىنشا (دەنساۋلىققا قاساقانا جەڭىل زيان كەلتىرۋ) اكىمشىلىك جاۋاپكەرشىلىككە تارتىلدى.

ەكىنشى كۇنى ءبىر توپ جەرگىلىكتى تۇرعىن جانجالدىڭ ءمانىن تۇسىنبەي، كاسىپورىن اۋماعىندا بولعان بىرنەشە شەتەلدىك جۇمىسشىنى ۇرىپ-سوققان. سالدارىنان ءتورت قىتاي ازاماتى جاراقات الىپ، اۋرۋحاناعا جەتكىزىلدى.

جاپپاي توبەلەستەن كەيىن قۇقىق قورعاۋ ورگاندارى تەكسەرىس جۇرگىزىپ، زاڭسىز جۇمىس ىستەيتىن 70 شەتەلدىك جۇمىسشىنى انىقتادى.

Abai.kz