بۇل تۋرالى 4 قازاندا سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى شىڭعىس قابدۋلا مالىمدەدى. جەرگىلىكتى اقپارات اگەنتتىكتەرىنىڭ حابارلاۋىنشا، دەنساۋلىق ساقتاۋ ءمينيسترىنىڭ ورىنباسارى ءلاززات اقتاەۆا شەتىنەگەن نارەستەنىڭ شەشەسى مەن تۋىستارىنان كەشىرىم سۇراعان.
تەرگەۋ مالىمەتتەرىنە قاراعاندا "دارىگەرلەر ومىرگە كەلگەن نارەستەنى ولدىگە ساناپ، قۇجات تولتىرىپ جىبەرگەن. بىراق كەيىن نارەستەنىڭ ءتىرى ەكەنى انىقتالعان. ال دارىگەرلەر بازاعا ەنگەن قۇجاتتى وزگەرتپەۋ ءۇشىن نارەستەنى توڭازىتقىشقا سالعان".
شىڭعىس قابدۋلانىڭ سوزىنشە، "نارەستەنى توڭازىتقىشتا قالدىرۋ تۋرالى بۇيرىقتى اتىراۋ وبلىستىق پەرزەنتحانا ديرەكتورى بەرگەن" دەگەن كۇدىك بار.
سىبايلاس جەمقورلىققا قارسى ءىس-قيمىل اگەنتتىگى وكىلىنىڭ سوزىنشە، بۇل جايت پەرزەنتحانا ديرەكتورىنا قاتىسى بار وزگە ءىستى تەكسەرۋ كەزىندە بەلگىلى بولعان. كابۋلانىڭ سوزىنشە، پەرزەنتحانا ديرەكتورى "شەتىنەگەن تاعى ءبىر نارەستەگە جاسالعان ساراپتامانى ءوز پايداسىنا شەشۋ ءۇشىن اتىراۋ وبلىستىق سوت-مەديتسينا ينستيتۋتىنىڭ باسشىسىنا 300 مىڭ تەڭگە (شامامەن 800 دوللار) پارا بەرگەن" دەگەن كۇدىككە ىلىنگەن.
"ول دەمەۋشىلەردىڭ اقشاسىنا شەتەلگە دەمالىسقا كەتكەن. ءبىز تەكسەرۋ كەزىندە ونىڭ تەلەفون ارقىلى ارىپتەستەرىنە نارەستەنى مۇزداتقىشقا سالۋ تۋرالى بۇيرىق بەرگەنىن ەستىدىك. پەرزەنتحاناعا دەرەۋ جەتكەنىمىزبەن ۇلگەرمەدىك. ءسابي مۇزداتقىشتا جانسىز جاتتى" دەدى كابدۋلا.
Abai.kz
