قىزىلوردادا قالا كۇنىنە وراي «اشىق اسپان استىندا» اتتى جاستار فەستيۆالى ءوتتى. جاستار جىلىن اتاپ ءوتۋ ماقساتىندا وتكىزىلگەن شاراعا كوڭىلدى تاپقىرلار الاڭى جوباسىنا قاتىسۋشى ەلىمىزدىڭ  ۇزدىك 11 كومانداسى باقتارىن سىناپ، ەسترادا جۇلدىزدارى قالا تۇرعىندارىنا كوتەرىڭكى كوڭىل-كۇي سىيلادى.

 جاستار مەرەكەسىندە وبلىس اكىمىنىڭ ورىنباسارى ناۋرىزباي بايقاداموۆ، قالا اكىمى نۇرلىبەك نالىباەۆ قىزىلوردالىقتاردى قالا كۇنىمەن قۇتتىقتاپ، جاستارعا جىلى لەبىزىن ءبىلدىردى.

فەستيۆالگە ەلىمىزدىڭ تۇكپىر-تۇكپىرىنەن جينالعان ازىلكەشتەر ۇزدىك ازىلكەشتەر – ورال قالاسىنان «24 ساعات»، «قازيتۋ»، قاراعاندى وبلىسىنان «قاراعاندى قۇراماسى»، جامبىل وبلىسىنان «شۋ-چۋ»، «تاراز 2000»، تۇركىستان وبلىسىنان «ارىس»، الماتى قالاسىنان «اۋىلدار قۇراماسى»، ارال اۋدانىنان «ارال-اس»، قارماقشى اۋدانىنان «قارماقشى قۇراماسى»، قىزىلوردا قالاسىنان «قورقىت جاستارى» جانە «قورقىت» قۇرامالارى ءوزارا سىنعا ءتۇستى.

كتا ويىندارىنا قازىلىق ەتۋ ماقساتىندا قازاقستاننىڭ ەسترادا جۇلدىزدارى داستان ورازبەكوۆ، نۇرجان كەرمەنباەۆ، جەرلەسىمىز، بەلگىلى ازىلكەش قانات ءالجاپپاروۆ ارنايى شاقىرىلدى. كەشتى بەلگىلى شوۋمەن، ازىلكەش تۇرسىنبەك قاباتوۆ جۇرگىزدى.

سايىس قورىتىندىسىمەن ءى ورىندى ارال اۋدانىنىڭ «ارال-اس» كومانداسى قانجىعاسىنا بايلاپ، 1 ملن تەڭگە سىياقىعا يە بولدى. ءىى ورىندى «تاراز 2000» كومانداسى جەڭىپ السا،  ىىى ورىندى ورال قالاسىنىڭ «قازيتۋ» كومانداسى يەمدەندى.

ايتا كەتەيىك، بۇعان دەيىن سىر جاستارىنىڭ ءانۇرانىنا بايقاۋ جاريالانعان بولاتىن. وسى فەستيۆالدە ءادىل قازىلاردىڭ شەشىمىمىن جەڭىسكە جەتكەن ءانۇران اۆتورى جارىلقاسىن ورازقۇلوۆقا 500 مىڭ تەڭگە سىياقى تابىستالىپ، ءاننىڭ تۇساۋى كەسىلدى.

Abai.kz