قىزىلورداداعى جەڭىل ونەركاسىپ قاۋىمداستىعى العاشقى ونىمدەرىن «Qobyz» ساۋدا بەلگىسىمەن شىعارا باستادى، - دەپ حابارلايدى اباي-اقپارات.

بۇل جونىندە قىزىلوردا وبلىستىق جەڭىل ونەركاسىپ قاۋىمداستىعىنىڭ توراعاسى، «Dalatex» كومپانياسىنىڭ ديرەكتورى دىلمۇحامەد ابىزوۆ مالىمدەدى.

ونىڭ ايتۋىنشا، قاۋىمداستىڭ بيىلعى جىلى قولعا العان «باستاۋىش سىنىپتارعا ارنالعان بىرىڭعاي مەكتەپ فورماسى» الەۋمەتتىك جوباسىنا قالادان ازىرگە 33 مەكتەپ قاتىسقان. پيلوتتىق جوبا اياسىندا مەكتەپ فورماسى ءبىرىنشى كلاسس وقۋشىلارىنا ارنالىپ تىگىلگەن. جوبانى جۇزەگە اسىرۋعا «Dalatex»-تەن وزگە 20-عا جۋىق تىگىن شەبەرحاناسى قاتىسىپ، 100-دەن استام ادام جۇمىسپەن قامتىلعان.

- جوبانى ءبىرىنشى رەت جۇزەگە اسىرعاندىقتان جەتكىزۋدە، تاپسىرىستى دەر كەزىندە ورىنداۋدا كەمشىلىكتەرىمىز دە بولدى. دەگەنمەن العان مىندەتتەمەمىزدى تولىقتاي ورىنداپ شىقتىق. جوبانىڭ ەڭ ۇلكەن جەتىستىگى شاعىن 20-عا جۋىق تىگىن شەبەرحاناسىن تاپسىرىسپەن قامتاماسىز ەتە العانىمىز. كەلەسى ءبىر ارتىقشىلىعى جوبانىڭ الەۋمەتتىك جوبا بولعاندىعىندا. ياعني تىگىلەتىن كيىمدى 10-12 مىڭ تەڭگەدەن اسىرعان جوقپىز، - دەيدى دىلمۇحامەد ابىزوۆ.

سونىمەن قاتار ول «باستاۋىش سىنىپ وقۋشىلارىنا ارنالعان مەكتەپ فورمالارى» جوباسىنىڭ جۇزەگە اسۋىنا جەرگىلىكتى تاۋاروندىرۋشىلەردىڭ بۇل سالامەن اينالىسپاۋى تۇرتكى بولعانىن ايتتى.

- وڭىرىمىزدە باستاۋىشتا 50-60 مىڭ بالا وقيدى. بۇل وقۋشىلارعا وقۋ فورماسىن الۋ ەڭ تومەنگى ەسەپپەن ەسەپتەگەننىڭ وزىندە جوبامەن 500 ملن.تەڭگەنى قۇرايدى. وسىنشاما قارجى سىرتقا، ناقتىراق ايتقاندا وزبەكستان مەن قىرعىزستانعا جانە وزگە دە ەلدەرگە كەتىپ جاتىر. ءبىز وسى وڭىردە تۇرعاندىقتان اتالمىش قارجىنىڭ ەڭ بولماعاندا 30 پايىزى ءوز وبلىسىمىزدا قالسا، ەكونوميكامىزعا پايداسى تيسە، الەۋمەتتىك جاعدايدى جاقسارتۋعا جۇمىس جاساسا دەگەن الدىمىزعا ماقساتتى قويدىق، - دەيدى وبلىستاعى جەڭىل ونەركاسىپ قاۋىمداستىعىنىڭ توراعاسى.

قاۋىمداستىق «Qobyz» ساۋدا بەلگىسىمەن جارىققا شىققان ءونىم كولەمىن ودان ءارى ارتتىرىپ، ءارى قاراي جالعاستىرۋدى كوزدەپ وتىر.

ايتا كتەيىك، قىزىلوردا وبلىسىندا كاسىپكەرلەر پالاتاسىنىڭ الاڭىندا تىگىن تسەحتارىنىڭ يەلەرى مەن قولونەرشىلەر، ديزاينەرلەر جينالىپ، وڭىرلىك جەڭىل ونەركاسىپ قاۋىمداستىعىن قۇرعان بولاتىن.

Abai.kz