اعىمداعى جىلى وبلىس بويىنشا 183,1 مىڭ گەكتار اۋىلشارۋاشىلىعى داقىلدارى ەگىلدى. ونىڭ ىشىندە كۇرىش ەگىسىنىڭ كولەمى 87,9 مىڭ گەكتاردى قۇرادى. ەگىس كولەمى 2018 جىلمەن سالىستىرعاندا 5,8 مىڭ گەكتارعا ارتىپ وتىر.

بۇگىن وبلىس اكىمدىگىنىڭ اپپاراتتىق ماجىلىسىندە ەگىن جيناۋ جۇمىسىنىڭ بارىسى تۋرالى وبلىستىق اۋىل شارۋاشىلىعى باسقارماسىنىڭ باسشىسى قامباربەك مۇباراكوۆ  باياندادى.

اعىمداعى جىلى بارلىق ەگىلگەن ءداندى داقىلدار 97,5 مىڭ گەكتاردى قۇراپ، 2018 جىلمەن سالىستىرعاندا 2,4 مىڭ گەكتارعا ارتتى. ءارتاراپتاندىرۋ باعىتى بويىنشا كۇرىشتەن باسقا ءداندى داقىلدار كولەمى 2,4 مىڭ گا، مال ازىقتىق داقىلدار 3,4 مىڭ گا، كارتوپ، كوكونىس جانە باقشا داقىلدارى 639 گا ۇلعايتىلدى.

«بۇگىنگى كۇنگە وبلىس بويىنشا كۇرىشتەن باسقا بارلىق ءداندى داقىلدار مەن ماقسارى تولىق جينالدى. كۇزدىك جانە جازدىق بيداي، ارپا داقىلدارىن جيناۋ جۇمىستارى تولىعىمەن اياقتالدى. سونىمەن قاتار، داندىك جۇگەرىنىڭ 55,9%،  جينالدى. قازىرگى ۋاقىتتا كارتوپ داقىلىنىڭ 48%، كوكونىستىڭ 68%، باقشانىڭ 67% جينالدى. ورتا ءونىم كارتوپتىڭ ءار گەكتارىنان 119 تسن، كوكونىستەن 171,9 تسن، باقشادان 212 تسن، ماقسارىدان 9,1 تسن ءونىم الىنۋدا»،-دەدى ق.مۇباراكوۆ.

سونىمەن قاتار، قىسقا قاجەتتى مال ازىعى دايىندالدى. وبلىس بويىنشا بارلىعى 577,3 مىڭ توننا دايىندالدى. ونىڭ ىشىندە 192,4 مىڭ توننا - جوڭىشقا ءشوبى جانە 384,9 تىڭ توننا - تابيعي ءشوپ.

كۇرىش جيناۋ جۇمىستارىن وڭتايلى مەرزىمىندە اياقتاۋ ءۇشىن قولدا بار بارلىق مۇمكىندىكتەر جۇمىلدىرىلعان. جانار-جاعارمايمەن قامتاماسىز ەتۋ ماسەلەسى تولىق شەشىلگەن. كۇزگى ەگىن جيناۋ جۇمىستارىن جۇرگىزۋ ءۇشىن 16 مىڭ توننا مەملەكەت تاراپىنان ارزانداتىلعان ديزەل وتىنى ءبولىنىپ وتىر. تامىز ايىنا بولىنگەن 4,6 مىڭ توننا ديزەل وتىنىنىڭ 3 705 تونناسى وبلىسقا جەتكىزىلدى.

«بيىلعى جىلى اۋا رايىنىڭ قولايلى بولۋىنان ەگىن ەگۋ مەن كۇتىپ – باپتاۋ جۇمىستارى مەرزىمىندە اتقارىلدى. ەگىن جيناۋ جۇمىستارىنا قاجەتتى تەحنيكالارى دا جەتكىلىكتى. جالپى كۇرىش جيناۋ جۇمىستارىن اۋا رايى قولايلى بولسا، 5 قازاننان كەشىكتىرمەي اياقتاۋدى جوسپارلاپ وتىرمىز»،-دەپ اتاپ ءوتتى ق.مۇباراكوۆ.

Abai.kz