الماتىدا قر پرەمەر-ءمينيسترىنىڭ ورىنباسارى بەردىبەك ساپارباەۆ بەلسەندى جاستارمەن جانە ۆولونتەرلارمەن كەزدەستى.

«قازاقستاننىڭ دامۋىنا ۇلەس قوسۋ ءۇشىن جاستار ساپالى ءبىلىم مەن تاربيە الۋى كەرەك. بارلىعى سىزدەرگە بايلانىستى. سىزدەرگە سپورت جانە مادەني نىساندار قولجەتىمدى بولۋى ءۇشىن بارلىق جاعداي جاسالادى»، - دەدى ساپارباەۆ.

«جاقىن ارادا حالىقارالىق ستاندارتتارعا ساي ۋنيۆەرسيتەتتەر اشىلادى. ءبىزدىڭ جاستار قازاقستاندا ءبىلىم الۋى كەرەك. يا، «بولاشاق» باعدارلاماسى وتە جاقسى، ءوز جەمىسىن بەرۋدە. ءسىزدىڭ دوستارىڭىز، باۋىرلارىڭىز، اپكە-قارىنداستارىڭىز وسى باعدارلاما ارقىلى شەت ەلدە ءبىلىم الىپ كەلدى. قازىر ولار مەملەكەتتىك قىزمەتتە. ءبىز ءۇشىن سىزدەردىڭ قازاقستاندا وقىعاندارىڭىز ماڭىزدى»، - دەپ تولىقتىردى ول جاستارمەن كەزدەسۋدە.

ءوز كەزەگىندە قر اقپارات جانە قوعامدىق دامۋ ۆيتسە-ءمينيسترى دانيار ەسين ەلباسى جاستار ساياساتىن دامىتۋعا ۇنەمى نازار اۋداراتىندىعىن اتاپ ءوتتى.

«بۇگىنگى تاڭدا جاستارعا ارنالعان كوپتەگەن مەملەكەتتىك باعدارلامالار بار. 2017 جىلى قازاقستان 183 ەلدىڭ جاستارىن دامىتۋدىڭ حالىقارالىق رەيتينگىندە 61-ءشى ورىندى يەلەندى. 2019 جىل جاستار جىلى دەپ جاريالاندى. مينيسترلىك، ۇكىمەت جاستاردى الەۋمەتتەندىرۋگە باعىتتالعان 89 شارانى جوسپارلادى. بۇگىنگى كۇنگى ەڭ ۇلكەن جەتىستىك رەتىندە نۇر-سۇلتان، الماتى جانە شىمكەنت سياقتى ۇلكەن قالالاردا باسپانا ماسەلەسىنىڭ شەشىلۋىن اتاپ وتەر ەدىم. جۇمىس ىستەيتىن 29 جاسقا دەيىنگى جاستارعا جالدامالى باسپانا 5 جىلعا بەرىلەدى. بۇل ۋاقىت ارالىعىندا ولار اقشالارىن جيناپ، باسقا مەملەكەتتىك باعدارلامالاردى پايدالانا الادى»، - دەدى دانيار ەسين.

ايسۇلۋ ەرنيازوۆا ەرىكتىلەردىڭ اتىنان بەردىبەك ساپارباەۆتان ەلىمىزدەگى بارلىق جوو-لاردا ەرىكتىلەر ۇيىرمەسىن اشۋ، ستيپەنديا جانە اقىلى بولىمدە ءبىلىم الىپ جاتقان ەرىكتىلەرگە جەڭىلدىكتەر قاراستىرۋ ماسەلەسىن شەشىپ بەرۋدى ءوتىندى.

«راسىندا دا، قر ءبىلىم جانە عىلىم مينيسترلىگى مەن اقپارات جانە قوعامدىق دامۋ مينيسترلىگىنە ءار وقۋ ورنىندا وسىنداي كلۋبتار مەن قاۋىمداستىقتار قۇرۋ قاجەت»، - دەپ قورىتىندىلادى بەردىبەك ساپارباەۆ.

دەرەككوز: قازاقپارات

Abai.kz