قازاقستان رەسپۋبليكاسىنىڭ مادەنيەت جانە سپورت ءمينيسترى ا.ر. رايىمقۇلوۆا حانىمعا!

قۇرمەتتى اقتوتى راحمەتوللاقىزى!

مەن، كينودراماترۋرگ س. ەلۋباەۆ 2017-18 جىلدارى ەلباسى ن. نازارباەۆتىڭ تاپسىرماسىمەن قازاقتىڭ ۇلى حانى قاسىم حان تۋرالى ماتەريال جيناپ 1 سەريالىق پروكاتتىق كوركەم فيلم ستسەناريىن جازدىم. ەلباسى ءبىز جازعان ستسەناريدى قاتتى ۇناتىپ سول كەزدەگى مينيستر ارىستانبەك مۇحامەديۇلىنا «ەرتۇعرىلدى» تۇسىرگەن تۇرىك رەجيسسەرى م. گيۋنايدى شاقىرۋدى تاپسىردى. گيۋناي ءبىز جازعان ستسەناريمەن تانىسىپ ۇناتتى. بىزبەن جانە مينيسترمەن كەزدەسۋىندە ءبىر سەريالى پروكاتتىق فيلم جاساۋعا كەلىستى. الايدا گيۋنايدىڭ پرەزيدەنتپەن كەزدەسۋى ۇستىندە سەريال يدەياسى پايدا بولىپتى. بىراق، سەريالعا ءبىزدى شاقىرمادى. سويتسەك ستسەناريدى گيۋنايدىڭ ءوزى جازۋعا كىرىسكەن. قازاقستان تاراپىنان ب. شەكەروۆ شاقىرىلدى. ءبىز ءسويتىپ بۇل جوبادان تىس قالدىق. ءسويتىپ، ەلباسى ۇناتقان ءبىز جازعان «قاسىم حان» دالادا قالدى. «ەڭ بولماسا ەلۋباەۆتىڭ ءبىر جىلدىق ەڭبەگىن تولەيىك!» دەگەن ءبىر ادام بولمادى.

كازىر، رەجيسسەر گيۋناي ءوزى جازعان 75 سەريالىق ستسەناري بويىنشا وڭتۇستىك قازاقستاندا سەريالدى تۇسىرۋگە كىرىسكەن دەيدى. ءبىز ءبىر نارسەگە تاڭ قالامىز. گيۋناي جازعان ستسەناري نەگە «قازاقفيلمنىڭ» ەكسپەرتتىك كەڭەسىن اينالىپ ءوتتى؟ 11 ميلليارد قازاقتان اقشاسىنا تۇسىرىلە باستاعان قازاقتىڭ ۇلى حانى تۋرالى ستسەناري نەگە قوعامدىق پىكىردەن تاسادا /كەلەينو/ شەشىلدى؟ نەگە ەش جەردە تالقىلانبادى؟ نەمەسە، كىمدەر تالقىلادى؟ ءبارى قۇپيا. ءبارى استىرتىن. بۇل كينو تاريحىندا بولماعان پراكتيكا.

سوندىقتان مەن قاسىم حان تاعدىرىنا الاڭداپ سىزگە وسى حاتتى جازدىم. ستسەناريست، رەجيسسەر، اكتەر شەتەلدەن شاقىرىلىپ 30 ميلليون دوللارعا تۇسىرىلگەن «كوشپەندىلەر» تاعدىرى قازاقستانعا تيتتەي دە ءبىر ساباق بولماعان ءتارىزدى. رەجيسسەرى، ستسەناريستى، ت.ب. تۇرىكتەر «قاسىم حان» تاعدىرى دا سول «كوشپەندىلەر» تاعدىرىن قايتالاماسىنا كىم كەپىل؟ قاشانعا دەيىن قازاققا قازاق تاريحىن ەكراندا شەتەلدىكتەر ۇيرەتىپ جۇرۋگە ءتيىس؟! ەرتەڭ ەكراننان قازاق ەمەس باسقا قاسىم حاندى كورىپ تۇگەل قازاقستان شۋلاپ كەتپەسىنە كىم كەپىل؟ «بۇعان كىم كىنالى؟» دەپ سۇراماسىنا كىم كەپىل؟

ەڭ قيىنى ەرتەڭ وسى جوبانىڭ جاماناتىنا ەلباسى مەن ءسىز قالماۋلارىڭىز ءۇشىن گيۋناي جازعان «قاسىم حان» ستسەناريىن دەرەۋ كينوستۋديانىڭ ەكسپەرتتەر كەڭەسىنىڭ تالقىسىنا سالۋ كەرەك دەپ بىلەمىن!