22 تامىز كۇنى قىزىلوردادا ءداستۇرلى تامىز كونفەرەنتسياسى ءوتتى. كونفەرەنتسياعا ءبىلىم جانە عىلىم مينيسترلىگىننىڭ وكىلدەرى، پارلامەنت دەپۋتاتتارى، ءبىلىم بەرۋ مەكەمەلەرى مەن ۇەۇ وكىلدەرى قاتىستى، ولار وقۋ ورىندارىن تسيفرلاندىرۋ مۇمكىندىكتەرى مەن جاس تالانتتاردى تاربيەلەۋ تۋرالى باياندادى.

كونفەرەنتسيا بارىسىندا وبلىس اكىمى قۋانىشبەك ىسقاقوۆ ءبىلىم بەرۋ سالاسىنداعى نەگىزگى مىندەتتەردى سارالاپ بەردى.

ايماق باسشىسى اتاپ وتكەندەي، ءبىلىم مەن عىلىمدى دامىتۋدىڭ 2016-2019 جىلدارعا ارنالعان مەملەكەتتىك باعدارلاماسىندا كوزدەلگەن نەگىزگى كورسەتكىشتەر ورىندالدى. دەگەنمەن، ودان بولەك شەشىمىن تابۋى ءتيىس بىرقاتار ماڭىزدى ماسەلەلەر دە بار.

«بىرىنشىدەن، وبلىستا 3-6 جاستاعى بالالار بەكىتىلگەن مەرزىمىنەن بۇرىن بالاباقشامەن 100 پايىز قامتىلدى. دەگەنمەن، 3 جاسقا دەيىنگى بالالاردىڭ بالاباقشامەن قامتىلۋ كورسەتكىشى ءالى دە تومەن دەڭگەيدە قالىپ وتىر. ەكىنشىدەن، سوڭعى 6 جىلدا  وبلىستا 69 مەكتەپ سالىندى،  ايماق مەكتەپتەرىنىڭ 60 پايىزى جاڭا موديفيكاتسيالىق پاندىك كابينەتتەرمەن قامتاماسىز ەتىلسە كومپيۋتەرلەر  100 پايىزعا جاڭارتىلدى. ەندى ءبىز مەملەكەت باسشىسىنىڭ تاپسىرماسىنا سايكەس الىس ورنالاسقان اۋىلدىق ەلدىمەكەندەردەگى مەكتەپ وقۋشىلارىنا قالالىق مەكتەپتەرمەن تەڭدەي دارەجەدە ساپالى ءبىلىم الۋعا جاعداي جاساۋى كەرەك»، - دەپ اتاپ ءوتتى وبلىس اكىمى.

سونىمەن قاتار، قۋانىشبەك ىسقاقوۆ باسەكەگە قابىلەتتى مامانداردى وقىتۋ، قازىرگى قوعامدا پەداگوگ مارتەبەسىن ارتتىرۋ، كوپبالالى جانە از قامتىلعان وتباسىلاردان شىققان وقۋشىلاردى قولداۋ، نارىق تالابىنا سايكەس تەحنيكالىق ماماندىق قىزمەتكەرلەرىن دايارداۋ جانە ءداستۇرلى قۇندىلىقتارعا سايكەس ۇلاعاتتى ۇرپاق تاربيەلەۋ ماسەلەلەرىنە توقتالدى.

ايماقتىڭ ۇزدىك پەداگوگتارى «قازاقستان رەسپۋبليكاسى ءبىلىم بەرۋ ءىسىنىڭ قۇرمەتتى قىزمەتكەرى» توسبەلگىسىنە يە بولدى، «ىبىراي التىنسارين» مەدالىمەن، سونداي-اق وبلىس اكىمىنىڭ قۇرمەت گراموتالارى جانە العىس حاتتارىمەن ماراپاتتالدى. سونىمەن قاتار،  № 277 ورتا مەكتەبىنە «ۇزدىك ورتا ءبىلىم ۇيىمى» نوميناتسياسى بويىنشا 17 ميلليون تەڭگە تابىستالدى.

ودان بولەك، كونفەرەنتسيا اياسىندا تاجىريبە الماسۋ ۇيىمداستىرىلىپ، «Promethean» كومپانياسىنىڭ باس كەڭەسشىسى يننا ستيۆەنس تسيفرلىق زاماندا ينتەراكتيۆتى تەحنولوگيالاردىڭ مۇمكىندىكتەرىن بايانداسا، «BTSDigital»وقۋ ورتالىعىنىڭ باسشىسى ساياسات نۇربەك جاڭا ماماندىقتار اتلاسى جوباسىن تانىستىردى. ال مانەرلەپ سىرعاناۋ بويىنشا الەم چەمپيوناتىنىڭ كۇمىس جۇلدەگەرى ەليزابەت تۇرسىنباەۆانىڭ اكەسى بايتاق تۇرسىنباەۆ دارىندى بالالاردى انىقتاۋدا اتا-انانىڭ ءرولىن تالداپ شىقتى.

وبلىس بويىنشا الداعى جاڭا  2019-2020 وقۋ جىلىندا 293 مەكتەپتە 164 500 وقۋشى ءبىلىم الادى دەپ كۇتىلۋدە.  ونىڭ ىشىندە،  1 سىنىپقا 21 600 وقۋشى بارادى دەپ جوسپارلانۋدا. قازىرگى تاڭدا قىزىلوردا قالاسىندا 600 ورىندىق ورتا مەكتەپ پەن 1450 ورىندىق 3 جەكەمەنشىك مەكتەپتىڭ قۇرىلىسى جۇرگىزىلۋدە. "اۋىل ەل بەسىگى" باعدارلاماسى اياسىندا قارماقشى اۋدانىنداعى №27, 30 جانە جالاعاش اۋدانىنداعى №201 مەكتەپتەرگە كۇردەلى جوندەۋ جۇمىستارى جۇرگىزىلۋدە. سونداي-اق، №288 مەكتەپتى اعىمداعى جوندەۋگە قاراجات ءبولىندى.

Abai.kz