6 تامىزدا جاريالانعان حاتتا HRW قازاقستان بيلىگى تەز ارادا شەشۋى ءتيىس ماسەلەلەردى اتاپ كورسەتكەن. ۇيىم توقاەۆتان بەيبىت جيىن وتكىزۋ قۇقىعى، ءسوز بوستاندىعى جانە باق جۇمىسىنا كەدەرگىلەردى الىپ تاستاۋىن، قىلمىسدىق كودەكستەگى بيلىكتى سىناۋشىلاردى قۋدالاۋ ءۇشىن پايدالانىلاتىن ەكىۇشتى باپتاردى قايتا قاراۋىن، بۇعان قوسا مۇگەدەك بالالاردىڭ قۇقىقتارىنىڭ ساقتالۋىن قامتاماسىز ەتۋىن سۇرادى.
"قازاقستانعا قۇقىقتار مەن ەركىندىكتى نىعايتۋدىڭ ۋاقىتى باياعىدا كەلگەن. العاشقى قادام رەتىندە پرەزيدەنت توقاەۆقا رەفورمالار كۇن ءتارتىبىن جاريالاپ، وعان باق، كاسىپوداق قۇقىقتارى جانە بەيبىت جيىن وتكىزۋ قۇقىقتارىن قامتاماسىز ەتۋ جونىندەگى ناقتى شارالاردى ەنگىزگەنى ءجون", - دەدى HRW ۇيىمىنىڭ ەۋروپا جانە ورتالىق ازيا جونىندەگى ديرەكتورى حيۋ ۋيليامسون.
ازاماتتىق بەلسەندىلەردى قۋدالاۋ ءۇشىن قولدانىلعان "ارازدىق تۋدىرۋ" بابىنا كۇمان كەلتىرگەن HRW توقاەۆقا جازعان حاتىندا بەلسەندى ماكس بوقاەۆ پەن تىركەلمەگەن "اتاجۇرت ەرىكتىلەرى" ۇيىمىنىڭ جەتەكشىسى سەرىكجان بىلاشقا قوزعالعان قىلمىستىق ىستەردى مىسالعا كەلتىردى.
حات اۆتورلارى "2018 جىلى ناۋرىزدا قازاقستان سوتى تىركەلمەگەن "قازاقستاننىڭ دەموكراتيالىق تاڭداۋى" قوزعالىسىن "ەكسترەميستىك" دەپ تانىعانىن، سودان بەرى اتالعان ۇيىمدى جاقتاۋشىلاردى قۋدالاۋ ءجۇرىپ جاتقانىن" اتاپ وتكەن.
قازاقستاندا "بيلىك تاۋەلسىز كاسىپوداقتاردى ابدەن تىقسىرعانىن" جازعان HRW نۇر-سۇلتاننان حالىقارالىق ەڭبەك ۇيىمىنىڭ بارلىق كەڭەستەرىن بۇلتارتپاي ورىنداۋىن تالاپ ەتتى.
Abai.kz
