جوندەۋدەن وتكەن ع.مۇراتباەۆ ستاديونىندا «قايسار» - «شاحتەر» ماتچى ءوتتى
قازاقستان پرەمەر ليگاسىنىڭ 17-ءشى تۋر ويىندارى ءوتتى. كەزەكتى تۋر اياسىندا قىزىلوردالىق «قايسار» ءوز الاڭىندا قاراعاندىلىق «شاحتەردى» قابىلدادى.
اسا تارتىستى وتكەن ويىن 2:2 ەسەبىمەن تەڭ اياقتالدى. ستويچو ملادەنوۆ شاكىرتتەرى ءوز الاڭىندا ءۇش ۇپايعا لايىق ونەر كورسەتكەنىمەن، قوناقتار ءوز مۇمكىندىكتەرىن ءساتتى پايدالانىپ، سىر جاعاسىنان ءبىر ۇپاي الىپ كەتتى.
«قايسار» - «شاحتەر» 2:2 (2:1)
گولدار: گراف 17’، مبومبو 29’، - نۇرعاليەۆ 33’، پەشيچ 63'
ەرەكشە ايتا كەتەرلىگى، بۇل ماتچ كۇردەلى جوندەۋدەن وتكەن ع.مۇراتباەۆ اتىنداعى ورتالىق ستاديوندا ءوتتى. قىزىلوردا قالاسىنداعى نەگىزگى الاڭدا جۇرگىزىلگەن كۇردەلى جوندەۋ اسا ساپالى بولدى. ورتالىق ستاديون شىت جاڭا بەينەگە ەندى. ەلوردا كۇنىنە وراي وتكەن شاراعا وبلىس اكىمى قۋانىشبەك ىسقاقوۆ قاتىسىپ، ويىنشىلارعا ساتتىلىك تىلەدى.
– 20 جىلدان كەيىن «قايسار» كومانداسى قازاقستان كۋبوگىنىڭ فينالىنا شىقتى. بۇل ءۇشىن فۋتبولشىلار مەن باپكەرلەرگە العىسىمدى بىلدىرەمىن. سونداي-اق، ءبىز ەرەكشە شارانىڭ كۋاگەرىمىز! وسىدان ءبىر جارىم جىل بۇرىن باستالعان ع.مۇراتباەۆ اتىنداعى ورتالىق ستاديوننىڭ كۇردەلى جوندەۋ جۇمىسى تولىعىمەن اياقتالىپ، قولدانىسقا بەرىلمەك. وتكەن اپتادا ۋەفا-نىڭ ينسپەكتورى لۋندستروم پيتەر پاۋل كەلىپ، جۇرگىزىلگەن جۇمىستىڭ بارىسىمەن تانىسىپ، وڭ باعا بەردى. ۋەفا ساراپتاماسى بويىنشا الاڭ ەكىنشى كاتەگورياعا لايىق دەپ تانىلدى. ەندى ورتالىق ستاديون ەۋروپالىق ستاندارتقا سايكەس كەز كەلگەن ماتچتى قابىلداۋعا دايىن. ال، بۇگىنگى ويىندا قوس كومانداعا جاقسى كوڭىل-كۇي، جەڭىسكە دەگەن ۇمتىلىس تىلەيمىن، – دەدى ايماق باسشىسى.
مۇنان ءارى «قايسار» كومانداسىنا الداعى ۋاقىتتا دا قولداۋ بولاتىندىعىن ايتىپ، جانكۇيەرلەر كوكەيىندە جۇرگەن ساۋالعا جاۋاپ بەردى. سونىمەن قاتار، وڭىردە سپورت سالاسىن دامىتۋداعى جۇمىستاردى ءسوز ەتتى. ماسەلەن، الداعى ۋاقىتتا سىرداريانىڭ سول جاعالاۋىنان 3500 ورىندىق جابىق فۋتبول مانەجىنىڭ قۇرىلىسى باستالاتىن بولادى. سوڭعى 3 جىلدا 9 سپورت نىسانى پايدالانۋعا بەرىلسە، بالالار مەن جاسوسپىرىمدەر سپورت مەكتەپتەرى جەلىسىن ۇلعايتۋ جانە شۇعىلدانۋشىلار سانىن ارتتىرۋ بارىسىندا مەملەكەتتىك-جەكەمەنشىك ارىپتەستىك اياسىندا 9 جوبا جۇزەگە اسقان. بۇل جۇمىستار كەزەڭ-كەزەڭىمەن جالعاسىن تاباتىن بولادى.
Abai.kz
