قر ءبىلىم جانە عىلىم ءمينيسترى اسحات ايماعامبەتوۆتىڭ توراعالىق ەتۋىمەن ءبىلىم بەرۋ گرانتتارىن تاعايىنداۋ جونىندەگى رەسپۋبليكالىق كوميسسيا ءوز جۇمىسىن باستادى.

رەسپۋبليكالىق كوميسسيا وتىرىسىندا قر جوعارى وقۋ ورىندارىنا قابىلداۋ بويىنشا ۇلكەن دايىندىق جۇمىسىنىڭ قورىتىندىسى شىعارىلادى. بيىل ءبىلىم بەرۋ گرانتتارى ءبىلىم بەرۋ باعدارلامالارىنىڭ توپتارى بويىنشا تاعايىندالادى. جوو-عا قابىلداۋ كەزىندە ءتۇسۋشى ودان ءارى قاراي وقۋ ءۇشىن ناقتى ءبىلىم بەرۋ باعدارلاماسىن تاڭدايدى.

«2019-2020 وقۋ جىلىنا 53 785 گرانت ءبولىندى. كونكۋرسقا 64 452 تۇلەك قاتىسۋدا. اسىرەسە، ينجەنەرلىك، IT-باعىتتاعى وقىتۋ باعدارلامالارىنا سۇرانىس جوعارى. مەملەكەتتىك تاپسىرىستىڭ جالپى كولەمىنىڭ 47%-دان استامى ينجەنەرلىك، وڭدەۋ جانە قۇرىلىس جانە IT-تەحنولوگيالار سالاسىنا بولىنگەن. بۇل گرانتتاردى ەڭ لايىقتى تالاپكەر جەڭىپ الادى دەپ ۇمىتتەنەمىز»، - دەدى قر ءبىلىم جانە عىلىم ۆيتسە-ءمينيسترى فاتيما جاقىپوۆا.

اتاپ ايتقاندا، 8276 گرانت پەداگوگيكالىق عىلىمدارعا، 4088 گرانت – جاراتىلىستانۋ عىلىمدارى، ماتەماتيكا جانە ستاتيستيكاعا، 2200 گرانت – قىزمەت كورسەتۋگە، 1615 گرانت – ونەر جانە گۋمانيتارلىق عىلىمدارعا، 2435 گرانت – اۋىل شارۋاشىلىق عىلىمدار جانە ۆەتەرينارياعا جانە 2183 گرانت – الەۋمەتتىك عىلىمدار، بيزنەس جانە ەكونوميكا سالالارىنا بولىنگەن. سونىمەن بىرگە، ۆيتسە-مينيستر بيىلعى گرانت ءبولىنىسىنىڭ ەرەكشەلىگى تۋرالى ايتىپ بەردى.

«وتكەن جىلى «جوعارعى وقۋ ورىندارىنىڭ اكاەدميالىق جانە باسقارۋ دەربەستىگى تۋرالى» زاڭ قابىلداندى. سوندىقتان، بيىل جوو-لار ءبىلىم بەرۋ گرانتىن الۋ ءۇشىن ءوز ءبىلىم بەرۋ باعدارلامالارىن جاساپ شىعاردى. بيىلعى ەڭ باستى جاڭالىق – وسى. تاجىريبە مەن قۇجات قابىلداۋ قورىتىندىسى كورسەتكەندەي، ءبىزدىڭ تالاپكەرلەر ءبىلىم بەرۋ باعدارلامالارى بويىنشا دۇرىس تاڭداۋ جاساۋعا تىرىستى»، - دەدى ف. جاقىپوۆا.

كونكۋرس 5 تامىزعا دەيىن قورىتىندىلانادى. گرانت يەگەرلەرىنىڭ ءتىزىمى باسپا جانە ەلەكتروندى باق-تا جارىق كورەدى.

دەرەككوز: قازاقپارات

Abai.kz