مەملەكەت باسشىسى قاسىم-جومارت توقاەۆ ءىىم ۆيتسە-مينيستر ماحامبەت ابيساتوۆتى قىزمەتىنەن بوساتتى. بۇل تۋرالى اقوردا سايتى جاريالاعان.

مەملەكەت باسشىسىنىڭ وكىمىندە:

"ماحامبەت حايىرجانۇلى ابيساتوۆ قازاقستان رەسپۋبليكاسىنىڭ ىشكى ىستەر ءمينيسترىنىڭ ورىنباسارى قىزمەتىنەن;

نۇرلان شاديبەكۇلى الدابەرگەنوۆ قازاقستان رەسپۋبليكاسى ۇلتتىق ەكونوميكا مينيسترلىگىنىڭ جاۋاپتى حاتشىسى قىزمەتىنەن بوساتىلدى", دەپ جازىلعان.

ال، ابيساتوۆتىڭ ورنىنا قىزىلوردا وبلىسى پوليتسيا دەپارتامەنتىنىڭ باستىعى بولعان ارىستانعاني زاپپاروۆ تاعايىندالدى.

"Sputniknews.kz" سايتىنىڭ جازۋىنشا، ابيساتوۆتىڭ قىزمەتىنەن كەتۋىنە ۆيتسە-مينيسترگە قاتىستى داۋلى اۋديوجازبا سەبەپ بولعان.

ايتا كەتەيىك، وسىعان دەيىن الەۋمەتتىك جەلىگە "نا ليۋبوي سترەلكە وبوسنۋيۋ" دەپ اتالاتىن اۋديوجازبا تاراعان. ونىڭ سيپاتتاماسىندا جازبا اقتوبە وبلىسى پوليتسيا دەپارتامەنتىندەگى جينالىستا جاسالعانى ايتىلادى. تيتردە جيىنعا قاتىسۋشىلاردىڭ ءبىرىنىڭ داۋىسى ۆيتسە-مينيستر ماحامبەت ابيساتوۆقا تيەسىلى ەكەنى كورسەتىلگەن.

ەستەرىڭىزدە بولسا، اتالعان ماسەلەگە قاتىستى "Abai.kz" اقپاراتتىق پورتالى ماسەلە كوتەرىپ، ءىىم ەرلان تۇرعىمباەۆ مىرزانىڭ اتىنا اشىق حات جازعان.

ءىىم مالىمەتىنشە، قازىر اتالعان ماسەلەگە قاتىستى تەكسەرىس جۇرگىزىلىپ جاتىر ەكەن.  ىشكى ىستەر ءمينيسترى ەرلان تۇرعىمباەۆ فونوسكوپيالىق جانە فيلولوگيالىق ساراپتاما جۇرگىزىلىپ جاتقانىن مالىمدەدى.

Abai.kz