الماتىدا «Nur Otan» پارتياسىنىڭ ۇيىمداستىرۋىمەن قالالىق ءماسليحات دەپۋتاتتارى، پارتيانىڭ الماتىلىق بەلسەندى مۇشەلەرى مەن جاستار، قالا تۇرعىندارى  قاتىسقان «Biz  birgemiz!» اتتى بەيبىت شەرۋ بولىپ ءوتتى.

جۋرناليست، پۋبليتسيست، «انا ءتىلى» گازەتىنىڭ باس رەداكتورى ءاشىمجان جاناربەك جۇرگىزگەن القالى جيىندا قوعام قايراتكەرلەرى، ونەردىڭ وكىلدەرى، كوپبالالى انالار جانە جاستار دا ءوز ويلارىن ءبىلدىردى.

ميتينگكە بەيبىت ەلدىڭ تىنىشتىعىنا تىلەكشى، بولاشاققا سەنىممەن قارايتىن، كەزىندە ەل تاريحىنىڭ باستاۋىنداعى ەڭ  ماڭىزدى شەشىمدەر قابىلدانعان تاۋەلسىزدىگىمىزدىڭ التىن بەسىگى بولىپ سانالاتىن – الماتى تۇرعىندارى قاتىسىپ، جينالعان قاۋىمعا جالىندى سوزدەرىن ارنادى.

 –  كەشەگى 90-ىنشى جىلداردى ەسكە الايىقشى. ەكونوميكانىڭ بارلىق سالاسىندا داعدارىس. ءبىر بولكە نان مەن ءسۇت الۋ ءۇشىن تاڭنان كەشكە دەيىن كەزەكتە تۇراتىنبىز. اتا-انالارىمىزدىڭ قىزمەتىن تاستاپ، ءبىزدى اسىراۋ ءۇشىن بازار جاعالاپ كەتكەنىنەمەن دە كۋامىن. ساباعىمىزدى مايشاممەن وقىپ ەرجەتتىك.وسىنداي داعدارىستى جىلداردان ءبىزدى الىپ شىققان ەرتەڭگى جاقسى كۇندەرگە دەگەن سەنىم، جۇرەكتەگى پاتريوتتىق سەزىم بولاتىن. مىنە، قازىرتورتكۇل دۇنيەمەن تەرەزەمىز تەڭەلدى. ال وسىنداي ايرانداي ۇيىپ وتىرعان حالقىمىزدىڭ ىنتىماعىن ىدىراتىپ، ەل ىشىنە ىرىتكى سالعىسى كەلەتىندەر بار. كەزىندە قاراپايىم حالىقتىڭ بانكتەگى اقشاسىن جىمقىرىپ كەتكەن ءابىليازوۆ بۇگىن شەتەلدە وتىرىپ الىپ حالىقتى تاعى دا الاساپىرانعا ايداپ سالعىسى كەلەدى. ونداي ءجالاڭسوز ايتاققا ەرۋدىڭ قاجەتى جوق، – دەدى قالا جاستارى اتىنان مىنبەرگە شىعىپ ءسوز سويلەگەن «Qadam PRO» جشس-ءنىڭ ديرەكتورى ەلنۇر بەيسەنباەۆ.

سونداي-اق، ول جاستاردى جىگەرلى، ساۋاتتى، پاراساتتى بولۋعا، جاقسىلىعىمىزدى اسىرىپ جۇرۋگە، ال كەم-كەتىگىمىز بولسا بىرگە تولتىرۋعا شاقىردى. ءسوزىنىڭ سوڭىن ە.بەيسەنباەۆ الاشتىڭ ارداقتى اقىنى ماعجان جۇماباەۆتىڭ «مەن جاستارعا سەنەمىن» دەگەن جالىندى جىرىنان ءۇزىندى وقىپ تۇيىندەدى.

Abai.kz