2019 جىلدىڭ 1-4 شىلدە ارالىعىندا نۇر-سۇلتان قالاسىندا Astana Finance Days شاراسى وتەدى. حالىقارالىق قارجى ورتالىقتارىنىڭ، بيزنەس وكىلدەرى مەن عىلىمي توپتاردىڭ باسىن بىرىكتىرگەن ايتۋلى شاراعا ەكس-پرەزيدەنت نۇرسۇلتان نازارباەۆ پەن مەملەكەت باسشىسى قاسىم-جومارت توقاەۆ قاتىسادى دەپ جوسپارلانۋدا.  

سونىمەن قاتار، استانا حالىقارالىق قارجى ورتالىعىندا تىركەلگەن كومپانيا وكىلدەرى مەن قارجى ورتالىعى ورگاندارىنىڭ كەڭەس مۇشەلەرى دە قاتىسپاق.

وندا نەگىزىنەن يسلامدىق قارجىلاندىرۋ، قارجىلىق تەحنولوگيالار، ادام كاپيتالى، قۇقىقتىق رەتتەۋ سىندى تاقىرىپتار تالقىلانباق. سونىڭ نەگىزىندە كونفەرەنتسيا، سەمينارلار وتكىزۋ جوسپارلانىپ وتىر.

بىلتىر بۇل شاراعا 73 ەلدەن 7000 عا جۋىق قاتىسۋشى تىركەلگەن. 11 ەلمەن ەكى جاقتى قۇجاتقا قول قويىلىپ، 22 B2B كەزدەسۋ وتكىزىلگەن.

ايتا كەتەيىك، استانا قارجى ورتالىعى – الەم ينۆەستورلارى ءۇشىن ەسىگىن ايقارا اشقان حالىقارالىق ورتالىق. ول ورتالىق ازيا مەن تمد مەملەكەتتەرىنىڭ كەڭىستىگىندە العاش قۇرىلعان. اتالعان ورتالىقتىڭ قارجىلىق قىزمەت كورسەتۋدى رەتتەۋ جونىندەگى كوميتەتى يسلام قارجىلىق قىزمەتى جونىندەگى كەڭەسىنىڭ مۇشەلىگىنە ءوتتى. بۇل مۇشەلىك – استانا حالىقارالىق قارجى ورتالىعىنىڭ ەۋرازياداعى يسلام قارجى ورتالىعىنا اينالۋىنىڭ باستاماسى دەپ باعالاۋعا بولادى. سونداي-اق، بۇل قادام يسلامدىق قارجى يندۋسترياسىن دامىتۋعا تىكەلەي جول اشادى دەيدى ماماندار.

سونىمەن قاتار اتالعان قارجى ورتالىعى جۇمىسىنىڭ كەڭ قانات جايۋىنا «اشىق اسپان» حالىقارالىق جوباسىنىڭ قوسار ۇلەسى زور. وسى جوبانىڭ نەگىزىندە نۇر-سۇلتان قالاسى قارجى ورتالىعىنا مۇشە ەلدەرمەن تىكەلەي اۋە قاتىناسىن قالىپتاستىرۋعا بەت الدى.

سونداي-اق، ەل ۇكىمەتى بەكىتكەن ارنايى جول كارتاسىنا سايكەس، الەمنىڭ بىرقاتار ءىرى قارجىلىق ورتالىقتارى ورنالاسقان قالالارمەن تىكەلەي جانە تۇراقتى اۋە باعىتتارى اشىلماق. ال، وسى جىلدىڭ جىلدىڭ 1 قاڭتارىنان باستاپ بىرقاتار دامىعان ەلدەردىڭ ازاماتتارى ءبىزدىڭ ەلىمىزگە 30 كۇن مەرزىمگە ۆيزاسىز كەلۋگە رۇقسات بەرىلگەن. قارجى ورتالىعىندا ەڭبەك ەتەتىن شەتەلدىك ازاماتتارعا 5 جىل مەرزىمگە ۇزاق مەرزىمدى ۆيزا بەرىلەدى.

سىرتقى ىستەر مينيسترلىگىمەن بىرلەسە وتىرىپ «استانا» حالىقارالىق قارجى ورتالىعىندا «ءبىر تەرەزە» قاعيداتىمەن جۇمىس ىستەۋ ەنگىزىلگەن. جانە نۇر-سۇلتان قالاسىنداعى حالىقارالىق قارجى ورتالىعىنىڭ قاتىسۋشىلارىنا بىرقاتار سالىقتىق جەڭىلدىكتەر دە جاسالماق.

(سۋرەتتەر احقو-نىڭ ءباسپاسوز قىزمەتىنەن الىندى)

Abai.kz