مۇنداي شارا وداق ەلدەرىنىڭ زەينەتاقىمەن قامتاماسىز ەتۋ تۋرالى كەلىسىمدە قاراستىرىلعان. قول قويۋعا دايىن قۇجاتتا زەينەتاقى 2020 جىلدان باستاپ تولەنەتىنى كورسەتىلگەن.

قازىرگى نورماعا سايكەس زەينەتاقىنى بەلگىلەۋ جانە ونى تولەۋ ادامنىڭ تۇراقتى تۇرىپ جاتقان ەلىنە جۇكتەلگەن. ياعني، رەسەيدەن كەتىپ قالعان ميگرانتتار رەسەي زەينەتاقى قورىنان زەينەتاقى المايدى. جاڭا كەلىسىم تولەمدەردىڭ سحەماسىن وزگەرتەدى. ەندى رەسەيدە ءجۇرىپ جيناعان زەينەتاقىنىڭ ءبىر بولىگى ميگرانت رەسەيدەن كەتىپ قالسا دا تولەنەتىن بولادى. ەگەر رەسەي ازاماتى جاسى كەلىپ، زەينەتكە شىققان سوڭ ەۋروازيا وداعى ەلدەرىنىڭ بىرىنە كوشىپ كەتسە وعان زەينەتاقىنى رەسەي تولەيتىن بولادى، دەيدى ربك اگەنتتىگى.

زەينەتاقى تولەمدەرى كەلىسىم كۇشىنە ەنگەن كۇنىنەن باستاپ ەسەپتەلىپ، تولەنەدى. ياعني العاشقى تولەم ەۋرازيا وداعى ەلىنىڭ بىرىنە 2020 جىلدان كەيىن كوشكەندەرگە تولەنەدى.

رەسەي ەڭبەك مينيسترلىگىنىڭ حابارلاۋىنشا، زەينەتاقى قورى 2020-2021 جىلدار جاڭا كەلىسىم بويىنشا 166 ميلليون رۋبل تولەيدى. ونىڭ 91 ميلليونى وداقتىڭ وزگە ەلىنە كوشىپ كەتكەن رەسەي ازاماتتارىنا تولەنۋى ءتيىس. تولەمدەر ميگرانتتاردىڭ ەڭبەك وتىلىنە قاراي وسىرىلەتىنى ايتىلعان.

Abai.kz