پروكۋراتۋرا تاراتقان حابارعا قاراعاندا، "ۆكونتاكتە" الەۋمەتتىك جەلىسىندە سايلاۋ بويىنشا قوعامدىق پىكىرگە ساۋال سالعان الماتى قالاسىنىڭ تۇرعىنى 17 مامىردا 15 ايلىق ەسەپتىك كورسەتكىش مولشەرىندە (37 875 تەڭگە) ايىپپۇلعا كەسىلگەن. ۆەدومستۆو حابارىندا "Facebook" الەۋمەتتىك جەلىسىندە جاساعان قۇقىق بۇزۋشىلىعى ءۇشىن الماتى وبلىسىنىڭ تۇرعىنى تاپ وسىنداي اكىمشىلىك جاۋاپقا تارتىلدى" دەپ جازىلعان.
بۇعان دەيىن، 21 مامىردا قازاقستان ادام قۇقىقتارى جونىندەگى حالىقارالىق بيۋرو تالدىقورعاندا نۇر يتجانوۆ ەسىمدى بەلسەندىنىڭ سايلاۋ تۋرالى ساۋالناما جۇرگىزگەنى ءۇشىن 37 875 تەڭگە ايىپپۇلعا كەسىلگەنىن حابارلاعان. 23 مامىردا بيۋرو اپەللياتسيالىق سوت بەلسەندىگە شىققان شەشىمدى وزگەرىسسىز قالدىرعانىن جازدى.
پروكۋراتۋرا قازاقستاندىق "Nur.kz" ينتەرنەت-رەسۋرسىنىڭ دا ورتالىق سايلاۋ كوميسسياسىنا ەسكەرتۋسىز ساۋالناما جۇرگىزگەنىن جازعانىمەن، باسىلىمنىڭ قانداي جاۋاپقا تارتىلعانىن كورسەتپەگەن.
ۆەدومستۆو قازاقستان اكىمشىلىك قۇقىق بۇزۋشىلىق تۋرالى كودەكستىڭ 120-بابىندا سايلاۋعا بايلانىستى قوعامدىق پiكiرگە ساۋال سالۋدى جۇرگiزۋ شارتتارىن بۇزعاندار جاۋاپقا تارتىلاتىنىن ەسكەرتكەن. زاڭ بويىنشا، ساۋالناما جۇرگىزۋ ەرەجەسىن بۇزعان جەكە تۇلعالارعا – 15, زاڭدى تۇلعالارعا 30 ايلىق ەسەپتىك كورسەتكىش مولشەرىندە ايىپپۇل سالىنادى.
قازاقستاندا كەزەكتەن تىس پرەزيدەنت سايلاۋى 9 ماۋسىمدا وتەدى. بۇل جولعى سايلاۋ ەلدى وتىز جىلعا جۋىق باسقارىپ، بيىل ناۋرىزدا قازاقستان پرەزيدەنتى قىزمەتىنەن كەتكەن نۇرسۇلتان نازارباەۆتىڭ قاتىسۋىنسىز وتكەلى وتىر. ورتالىق سايلاۋ كوميسسياسى جەتى ادامدى پرەزيدەنتتىككە كانديدات رەتىندە تىركەگەن:
- ءسادى-بەك تۇگەل - "ۇلى دالا قىراندارى" رەسپۋبليكالىق قوزعالىسى;
- قازىرگى پرەزيدەنت قاسىم-جومارت توقاەۆ - "نۇر وتان" پارتياسى;
- امانگەلدى تاسپيحوۆ - قازاقستان كاسىپوداقتار فەدەراتسياسى;
- دانيا ەسپاەۆا - "اق جول" پارتياسى،
- تولەۋتاي راحىمبەكوۆ - "اۋىل" پارتياسى;
- جامبىل احمەتبەكوۆ - "قازاقستان كومۋنيستىك حالىق پارتياسى";
- ءامىرجان قوسانوۆ - "ۇلت تاعدىرى" قوزعالىسى.
11 مامىردا ەلدە سايلاۋ الدىنداعى ۇگىت-ناسيحات كەزەڭى باستالدى. ول 8 ماۋسىمعا دەيىن سوزىلماق.
Abai.kz
