كلوۋن - ۇلكەن ونەر يەسى. تسيرك الاڭىندا ونىڭ قولىنان كەلمەيتىنى جوق. تسيركتەگى ارقانمەن ءجۇرۋ، فوكۋس، جونگلەر، تريۋكتەر، قويشى تەگى ولار مەڭگەرمەيتىن ماماندىق جوق. كورەرمەندى كۇلدىرۋ ءۇشىن كورمەگەن ازابى دا قالمايدى.

ال، ءبىزدىڭ وسىنداعى بىلگىش، "زيالى ورتا" بىرەۋلەردى سول كلوۋنعا (سايقىمازاق - دەپ) تەڭەپ جاتادى. كاسىبي دەڭگەيى، شەبەرلىگى كلوۋنداي بولعان ارتيست وتە از. ول وراسان زور ەڭبەكتىڭ ادامى... مەيلى ونىڭ كۇلكىلى ساتتەرى بىرەۋلەردىڭ ويىن جەڭىلدىككە جەتەلەيتىن شىعار. ۇمىتپاڭىزدار، اعايىن، تسيرككە بالالار كوپ بارادى، سوندىقتان ءسىز ونىڭ ارەكەتىنە ءسابي سياقتى سەنىپ، كۇلە المايسىز. ەسەيىپ كەتكەنسىز...

جارايدى، ايتپاعىم مۇلدە باسقا نارسە. كلوۋن دەپ باستاعان سوڭ سول تاسىلدە جالعايتىن بولسام، ءبىزدىڭ ۇلتتىق ماقتانىشتارىمىزدىڭ ءبىرى - ۇلتتىق كيىم. سونىڭ قازىر نەبىر ءتۇرى، ونى كيىپ، ەلگە كورسەتەتىن مودەلدەردىڭ دە نەبىر سويقاندارى پايدا بولدى. العاشىندا پالۋان دەنەلى جىگىتتەر شىنىمەن ماقتان بولدى. "مىنە، قازاقتىڭ جىگىتتەرى، قانداي!" - دەپ، كەۋدە قاقتىق. سۋرەتكە ءتۇسىپ، ماقتاندىق. ولاردى شەت ەلدەن كەلگەندەر باراتىن جەرگە تاسيتىن بولدىق، ءتىپتى الەم ارالاتتىق.

ەندى سولار كلوۋن بولىپ بارادى. ءبىر كىشىگىرىم پرەزانتاتسيا، رەستوراننىڭ اشىلۋى، ساۋدا ورتالىعىنىڭ جارناماسى، الپامىستاي باتىرلارىمىز قولدارىنا نايزا، قىلىش اسىنىپ بالمۇزداق كۇزەتىپ، تويلاردا قالىڭدىق كۇزەتەتىپ، سۇندەتكە وتىرعىزعان بالانى كوتەرىپ ءجۇر. ماقتانۋدىڭ دا ورنى بولۋ كەرەك شىعار...

مەن تۇسىنە بەرمەيتىن "اقشا تابۋ تاسىلدەرى" كوبەيىپ كەتىپتى ايتەۋىر... كۇندەردىڭ كۇنىندە سول باتىر كيىمدى الپاۋىتتار شاشىلىق ساتىپ تۇرسا تاڭقالمايتىن جاعدايعا جەتەرمىز بۇيتە بەرسەك...

اسقار نايمانتايدىڭ facebook پاراقشاسىنان

Abai.kz