رەسپۋبليكالىق «نۇر وتان» پارتياسى مەملەكەتىمىزدە الەۋمەتتىك كاسىپكەرلىكتى دامىتۋدى قولداماق. بۇل جايىندا پارتيا توراعاسىنىڭ ءبىرىنشى ورىنباسارى ماۋلەن اشىمباەۆ  استاناداعى «GreenTAL» الەۋمەتتىك شەبەرحاناسىنداعى جيىندا مالىمدەدى، - دەپ حابارلايدى اباي-اقپارات.

ەمين اسكەروۆتىڭ باستاماسىمەن وسىدان ءتورت جىل بۇرىن قۇرىلعان «GreenTAL» الەۋمەتتىك شەبەرحاناسى مۇمكىندىگى شەكتەۋلى جانداردى وقىتىپ، ولاردىڭ لايىقتى جۇمىس تابۋىنا جاردەمدەسىپ كەلەدى. وسى شەبەرحانا مۇگەدەك ازاماتتاردىڭ جۇمىسقا ورنالاستىرۋ ءۇشىن بارلىق قاجەتتى جاعداي جاساۋدا.استاناداعى اتالعان «GreenTAL» الەۋمەتتىك شەبەرحاناسىن ارنايى ات باسىن بۇرعان «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ شەبەرحانا جۇمىسىمەن تانىسىپ شىقتى.

– ەلباسىمىز نۇرسۇلتان ءابىشۇلى نازارباەۆتىڭ جولداۋىندا مۇمكىندىگى شەكتەۋلى جاندارعا جۇيەلى قولداۋ جاساپ، مۇگەدەك جاندار ءۇشىن كەدەرگىسىز ورتا قالىپتاستىرۋدى بىزگە مىنندەتتەدى. وسى ۇدەدەن شىعۋ ءۇشىن "نۇر وتان" پارتياسى بەلسەندى جۇمىستار جۇرگىزىپ جاتىر. ونىڭ مىسالى - «كەدەرگىسىز كەلەشەك» پارتيالىق جوباسى. وسى جوبا اياسىندا الدا بىرنەشە كەشەندى جۇمىستار اتقارىلماق. اتاپ ايتساق، ينكليۋزيۆتى ءبىلىم بەرۋ ءىسىن قولعا الدىق. مۇمكىندىگى شەكتەۋلى ازاماتتاردىڭ ساياسي-الەۋمەتتىك ومىرگە بەلسەنە ارالاسۋىن قامتاماسىز ەتۋ جولىندا دا بىرقاتار جۇمىستار جاسالۋدا. ولار ءۇشىن قازىرگى قوعام ىشىنەن كەدەرگىسىز ورتا قالىپتاستىرىپ، ولاردى جۇمىسپەن قامتۋعا باسىمدىق بەرە الساق، ءبىز ەلباسى العا قويعان ماقساتتىڭ ۇدەسىنەن شىعا الامىز، – دەدى ماۋلەن اشىمباەۆ

سونداي-اق، ماۋلەن اشىمباەۆ «نۇر وتان» پارتياسى كاسىپكەرلىكتى دامىتۋعا ىقپال ەتەتىن باسقا دا جوبالاردى قولعا الىپ جاتقانىن مالىمدەدى. پارتيا وسى يگى ىستە «GreenTAL» سەكىلدى كومپانيالاردىڭ تاجىريبەلەرىنە سۇيەنەتىنىن، بۇل اسا ماڭىزدى جۇمىستى مەملەكەتىمىزدىڭ وزگە ايماقتارىندا قولعا الۋ كەرەكتىگىنە توقتالدى.

Abai.kz