2019 جىلدىڭ 1 ساۋىرىندە ورتالىق كوممۋنيكاتسيالار قىزمەتىندە «قازاقستان» تەلەراديوكورپوراتسياسىنىڭ قۇرامىنا كىرەتىن «Qazaqstan» تەلەارناسىنىڭ  «JańǵyryQ»  جوباسىنا ارنالعان ءباسپاسوز-كونفەرەنتسياسى ءوتتى.

شاراعا «JańǵyryQ»  جوباسىنىڭ پروديۋسەرى، «Maqpalsher» جوباسىنىڭ اۆتورى  ماقپال جۇماباي،  ءانشى-اۆتورلار مارحابا ءسابي، ارشات حايروللا،   ەربول ناريمانۇلى قاتىستى.

««Qazaqstan» تەلەارناسى مۋزىكاداعى ءار ءتۇرلى باعىتتاردى جۇيەلى تۇردە  ناسيحاتتاپ كەلەدى. باسىم باعىتىمىز – ۇلتتىق ءان-كۇي ونەرى. «مەن قازاقپىن» ۇلتتىق مەگا جوباسى مەن «ۇلى دالا سازى» جوباسى – اقپاراتتىق كەڭىستىگىمىزدەگى  ۇلتتىق مۋزىكا باعىتىنداعى بىرەگەي جوبالار رەتىندە ءوز ورنىن ايقىندادى. بۇل جۇمىس ماقساتتى تۇردە جالعاسىن تابادى. «Qazaqstan» تەلەارناسىنىڭ كورەرمەندەرى سان الۋان، سونىڭ ىشىندە جاستاردىڭ ۇلەسى كوپ. سول جاستارىمىزدىڭ وتاندىق مۋزىكانى تىڭداپ، تالعامى مەن تاڭداۋى قاتار دامۋى ءۇشىن زاماناۋي مۋزىكاعا دا دەن قويىپ وتىرمىز.   جاڭاشىل  تۋىندىلار ۇسىنىپ جۇرگەن جاستاردى دا قولداپ كەلەمىز.    ءوز جەرىمىزدە پايدا بولعان q-pop جانرىنىڭ جانكۇيەرلەرى دە كوپ. قازاق ءتىلى مەن قازاق مۋزىكاسىن تۇرلەندىرىپ،  وزدىگىنشە دامىتقان بۇل سۋبمادەنيەتكە دە  ارنامىز ەفيرىنەن ورىن بەردى. سونىمەن قاتار، ەلىمىزدىڭ مادەني ومىرىندەگى ەلەۋلى وقيعا – ديماش قۇدايبەرگەننىڭ حالىقارالىق دەڭگەيدەگى «ارناۋ» اتتى ءىرى كونتسەرتىن «قازاقستان» تەلەراديوكورپوراتسياسى ۇيىمداستىرىپ وتىر. بۇل – ءبىز ءۇشىن مارتەبە ءارى زور جاۋاپكەرشىلىك.  ال نازارلارىڭىزعا ۇسىنىپ وتىرعان «JańǵyryQ»  جوباسى  زاماناۋي قازاق مۋزىكاسىندا ءوز جولىن سالىپ كەلە جاتقان اۆتورلىق مۋزىكاعا ارنالعان. بۇل جوبا  وزىندىك  ويىمەن، ورىنداۋ مانەرىمەن، شىعارماشىلىق يدەياسىمەن ەرەكشەلەنەتىن  اۆتورلاردى  جينايتىن مۋزىكالىق الاڭ.  «JańǵyryQ» –  اۆتورلىق مۋزىكا مەن جاندى دىبىستى ناسيحاتتايتىن ەلىمىزدەگى بىردەن-ءبىر مۋزىكالىق جوبا.  بۇل جوبا مۋزىكا سالاسىنداعى اۆتورلىق كوزقاراس پەن ورىنداۋشىلىق وزگەشەلىكتەردى كورسەتۋىمەن قۇندى.  جوبا بۇقارالىق سيپات العان بۇگىنگى  ءان ونەرىنە جاڭا تىنىس بەرەدى. سول ارقىلى وزىندىك اۋەزى مەن ۇستانىمى بار اۆتورلاردىڭ قالىپتاسۋىنا سەبەپ بولماق. ءبىز  «JańǵyryQ»  جوباسى ارقىلى جاڭا مۋزىكالىق باعىتتاردىڭ، مادەني قاۋىمداستىقتاردىڭ  تۋىنا ىقپال ەتەمىز دەپ سەنەمىز»، - دەدى جوبا پروديۋسەرى ماقپال جۇماباي.

«JańǵyryQ»  جوباسى 4  كونتسەرتتەن تۇرادى. جوبا ەرەكشەلىگى – ءار ورىنداۋشىنىڭ ءوز مۋزىكالىق توبى بار جانە ول ءوزىنىڭ اۆتورلىق تۋىندىلارىن عانا ورىندايدى. جوباعا  ەكسپەريمەنتالدى ەلەكتروندى مۋزىكا وكىلدەرى دە قاتىستى. ال ءتۇسىرىلىم ءبىر دۋبلمەن، كونتسەرتتىڭ شىنايىلىعىن ساقتاۋ ارقىلى جۇزەگە استى.  دىبىس پەن ۆيدەو ساپاسىن قامتاماسىز ەتۋ ءۇشىن ارنايى رەجيسسەرلىق توپ پەن دىبىس رەجيسسەرلەرى جۇمىس ىستەدى.

جيىن بارىسىندا مارحابا ءسابي: «جاندى داۋىستاعى كونتسەرتتەر مەن live فورماتتاعى جوبالارعا عانا قاتىسامىن دەپ وسىدان ءبىر جىل بۇرىن شەشىم قابىلداعان ەدىم. دەگەنمەن، بۇل ۇستانىمىمىزدى جۇزەگە اسىراتىن الاڭدار از بولدى. وسى رەتتە «Qazaqstan»  تەلەارناسىنىڭ بۇل باستاماسى وتە ماڭىزدى. مۇنداي جوبالار  ءبىز سەكىلدى ءانشى-اۆتورلاردىڭ شىعارماشىلىق مۇمكىندىگىن اشۋعا، جاندى دىبىستىڭ سالتانات قۇرۋىنا جانە تىڭدارماننىڭ تالعامىنىنان شىعۋعا  ىقپال ەتەدى» دەدى.

جوباعا 12 ورىنداۋشى قاتىستى. ولار: Moldanazar توبى، مارحابا ءسابي، Satzhan project, Maqpalsher, Darkhan Juzz, Jeltoksan, DAMU, Qonyratbay Fam, Qudyr, ARShAT, ámir.

جوبا قاتىسۋشىلارىنىڭ ءبىرى عالىمجان مولدانازار ءتۇسىرىلىم بارىسىندا: «وسىنداي جاندى داۋىستاعى مۋزىكانى حالىققا  تۋرا، بەتپەردەسىز جەتكىزىپ جاتقانى ءۇشىن ۇيىمداستىرۋشىلارعا العىس ايتامىن. ءبىز ءۇشىن مۇنداي جوبا ءبىرىنشى رەت، سوندىقتان قوبالجيمىز. بۇل – ءبىز ءۇشىن ۇلكەن تاجىريبە. ءاربىر ۋاقىتتىڭ تولقىندارى مەن جەلىسى بولادى. ول ءاردايىم بولعان، بولادى دا. ەڭ ماڭىزدىسى، ءبىزدىڭ  ونى قالاي جەتكىزەتىنىمىز. وسىنداي جوبالار جالعاساتىن بولسا، مۋزىكامىز ءۇشىن كەرەمەت سەرپىلىس بولادى دەپ ويلايمىن» دەگەن پىكىرىن بىلدىرگەن بولاتىن. ال  Satzhan project جوباسىنىڭ جەتەكشىسى ءساتجان شامەنوۆتىڭ پىكىرىنشە، «بۇل جوبا ەلىمىزدەگى مۋزىكانىڭ ساپالىق دەڭگەيىنىڭ كوتەرىلۋىنە سەپتىگىن تيگىزىپ، جاندى دىبىستىڭ قوزعالىس رەتىندە دامۋىنا ىقپال ەتەدى».

ءباسپاسوز-كونفەرەنتسياسى سوڭىندا «JańǵyryQ»  جوباسىنان ءۇزىندى كورسەتىلدى.

«JańǵyryQ» جوباسىنىڭ تۇساۋكەسەرىن 6 ءساۋىر كۇنى، 11:40 تا  «Qazaqstan» ۇلتتىق ارناسىنان كورە الاسىزدار!

ايتا كەتەيىك، «JańǵyryQ»  جوباسىنىڭ يدەيا اۆتورى ەرلان قارين، پروديۋسەرى ماقپال جۇماباي، قويۋشى رەجيسسەرى توعجان قۇرمانجانقىزى، دىبىس رەجيسسەرى ورالحان سادۋاقاس.

Abai.kz