تالدىقورعاندا الاكول كولى جاعالاۋىنداعى «Qoqtem Grand Resorts» بەسجۇلدىزدى قوناقۇيى تانىستىرىلىمىنا ارنالعان ءباسپاسوز كونفەرەنتسياسى ءوتتى. ءىس-شاراعا الماتى وبلىسى تۋريزم باسقارماسىنىڭ جەتەكشىسى جانار الشىمباەۆا، الماتى وبلىسى كاسىپكەرلەر پالاتاسى ادامي كاپيتالدى دامىتۋ ءبولىمىنىڭ باستىعى الماگۇل وڭعارباەۆا،  «Qoqtem Grand Resorts» قوناقۇي كەشەنىنىڭ باسقارۋشى ديرەكتورى الماجان باقتۇرازوۆا، سونداي-اق، تۋروپەراتورلار جانە باق وكىلدەرى قاتىستى.  

«اتامەكەن» ۇلتتىق كاسىپكەرلەر پالاتاسىنىڭ سايتىندا جازىلۋىنشا، قوناقۇي جەكە قارجىعا سالىنعان. قوناقۇيدىڭ اشىلۋى وسى جازعا جوسپارلانعان، الايدا كەشەن الدىن الا برونداۋدى ىسكە قوستى. كوپفۋنكتسيالى قوناقۇي كەشەنى 450 ورىنعا شاقتالعان. كەشەندە 102 ءنومىر بار، ونىڭ ىشىندە 97-ءسى – ستاندارتتى، 4-ءى – ليۋكس، 1 –پرەزيدەنتتىك ليۋكس ءنومىرى. كەشەن قولدانىسقا بەرىلگەن سوڭ 80 تۇراقتى جۇمىس ورنى اشىلادى. كەشەننىڭ جالپى اۋماعى 16 گەكتار.

«قوناقۇي كەشەنى بەس قاباتتان تۇرادى. جازعى تەرراساسى بار كافە، بالالار الاڭقايى، سپورت الاڭدارى اشىلادى. جايلى نومىرلەر مەن جاقسى سەرۆيس قوناقتاردىڭ كوڭىلدەرىنەن شىعادى دەگەن ويدامىن»، – دەپ اتاپ ءوتتى قوناقۇي كەشەنىنىڭ باسقارۋشى ديرەكتورى الماجان باقتۇرازوۆا.

الماتى وبلىسى تۋريزم باسقارماسىنىڭ جەتەكشىسى جانار الشىمباەۆا الاكول كولى جاعالاۋىنداعى ينفراقۇرىلىمدى جاقسارتۋ بويىنشا قولدانىپ جاتقان شارالار تۋرالى اقپارات بەردى. ونىڭ ايتۋىنشا، بيىل كول جانىندا اقشي اۋىلىندا شاعىن بازار اشىلىپ، ال قوناقۇيلەرىندە كادەسىيلار ساتىلاتىن بولادى.

«بولشەك ساۋدا نۇكتەلەرىن قۇرۋ ماقساتىندا قازىرگى ۋاقىتتا الاكول اۋدانىنىڭ باسشىلىعى ۋاقىتشا نىسانداردىڭ قۇرىلىسى باستالاتىن جەر تەلىمىن قاراستىرىپ قويدى. بۇل ساۋدا ورىندار كاسىپكەرلەرگە ۇسىنىلادى. سونىمەن قاتار قوانقتاردى ورنالاستىرۋ جەرلەردە كادەسىيلار ساتىلاتىن بولادى. وسىعان دەيىن كادەسىيلاردى كاسىبي وندىرەتىن ءبىر كومپانيامەن كەلىسىمگە كەلدىك»، – دەدى جانار الشىمباەۆا.

تۋريزم سالاسىندا مامانداردى دايىنداۋ، سەرۆيس ساپاسى ماسەلەسىن الماتى وبلىسى كاسىپكەرلەر پالاتاسى ادامي كاپيتالدى دامىتۋ ءبولىمىنىڭ باستىعى الماگۇل وڭعارباەۆا كوتەردى. سپيكەر «ەڭبەك» ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاما شەڭبەرىندە  كومپنايا جۇمىس ماماندارىن دايىنداۋمەن اينالىسا الاتىنىن ايتتى.

«بۇگىندە وبلىس اۋماعىندا  26 كومپانيا مامانداردى دايىنداۋ بويىنشا وقۋ ورتالىقتارىن قۇردى، سونىڭ ىشىندە 20 وقۋ ورنى كاسىپورىن جانىنان قۇرىلعان. الايدا، ولاردىڭ ىشىندە تۋريزم بويىنشا وقۋ ورتالىعى جوق. ال تۋريستىك سالا ءۇشىن كادر جانە سەرۆيس ماسەلەسى وزەكتى»، – دەدى الماگۇل وڭعارباەۆا.

ارى قاراي «جەتىسۋ» اۆياكومپانياسىنىڭ اۆيا تاسىمالدار قىزمەتىنىڭ اعا ديسپەتچەرى گۇلميرا قاسەنوۆا قوناقتارعا الاكول كولىنە ۇشۋ باعدارلاماسى تۋرالى اقپارات بەردى. ونىڭ ايتۋىنشا، 2017-2018 جىلدار ارالىعىندا كولگە بارعان جولاۋشىلاردىڭ سانى ارتقان.

2017 جىل ىشىندە ءۇشارال اۋەجايىنا 1880 جولاۋشى ۇشقان، ال بەرى  2148 جولاۋشى كەلگەن. ال 2018 جىلى كولگە ۇشۋعا – 4419 جولاۋشى، كولدەن كەلۋ 3641 جولاۋشىنى قۇراعان.

«بيىل استانا-ءۇشارال، ءۇشارال-الماتى باعىتى بويىنشا ۇشاقتار التى اي بويى اپتاسىنا 4 رەت ۇشاتىن بولادى. بيلەت قۇنى – 16 000 تەڭگە. الماتى-ءۇشارال-الماتى باعىتى بويىنشا رەيس التى اي بويى اپتاسىنا 6 رەت بولادى. قۇنى – 10 000 تەڭگە. رەيستەردى  Scat اۆياكومپانياسى جۇزەگە اسىرادى»، – دەدى گۇلميرا قاسەنوۆا.

بيىل تالدىقورعان-ءۇشارال-تالدىقورعان (بيلەتتىڭ جوسپارلانعان  قۇنى – 12 000 تەڭگە), الماتى-ءۇشارال-الماتى (بيلەتتىڭ جوسپارلانعان  قۇنى – 18 000 تەڭگە) باعىتى بويىنشا رەيستەردى «جەتىسۋ» اۆياكومپانياسى اپتاسىنا ءۇش رەت جۇزەگە اسىرادى.

ءىس-شارا بارىسىندا  «Complete Service» كومپانياسىنىڭ ىشكى تۋريزم دەپارتامەنتىنىڭ جەتەكىشىسى راۋشان سارتاەۆا سۋبسيديالاۋ، سانيتاريالىق ايماقتاردى جاقسارتۋ، قوناقۇيلەر قۇزىرەتتىلىگىن ارتتىرۋ جانە اقپاراتتىق تۋرلاردى وتكىزۋ ماسەلەلەرى تۋرالى اڭگىمەلەپ بەردى.

Abai.kz