مەملەكەت باسشىسى نۇرسۇلتان نازارباەۆتىڭ 2018 جىلعى 5 ناۋرىز كۇنگى "پرەزيدەنتتىڭ بەس الەۋمەتتىك باستاماسى" اتتى قازاقستان حالقىنا ۇندەۋىندە جۇمىسپەن قامتۋ جانە ماماندىعى جوق ازاماتتاردى كاسىپتىك بىلىممەن قامتۋ ماسەلەسى ايتىلعان ەدى.

مامانداردى دايىنداۋ سالاسىندا اتقارىلعان جۇمىس ناتيجەسى الماتى وبلىسى كاسىپكەرلەر پالاتاسىنىڭ ديرەكتورى ناريمان ابىلشايىقوۆتىڭ وڭىرلىك كوممۋنيكاتسيالار قىزمەتى الاڭىندا وتكەن ءباسپاسوز-كونفەرەنتسياسى بارىسىندا ايتىلدى.

سپيكەردىڭ ايتۋىنشا، «ەڭبەك» ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان مەملەكەتتىك باعدارلاماسى اياسىندا وڭىرلىك كاسىپكەرلەر پالاتاسى 26 وقۋ ورتالىعىن اشۋعا اتسالىستى، ونىڭ ىشىندە 20 وقۋ ورتالىعى كاسىپورىندار جانىنان قۇرىلعان.

«بىلتىر كاسىپورىندار جانىنان 20 وقۋ ورتالىعىن اشۋعا كومەك كورسەتتىك، وندا 852 ادام وقىپ شىقتى. ولاردىڭ بارلىعى جاڭا جۇمىس ماماندىقتارىن الدى. وقىپ شىققانداردىڭ 72%-ى جۇمىسقا تۇردى»، – دەدى ناريمان ابىلشايىقوۆ.

«ەڭبەك» مەملەكەتتىك باعدارلاماسى شەڭبەرىندە كاسىپورىندار مەملەكەتتىك بيۋدجەت ەسەبىنەن وزدەرىنە مامانداردى دايىنداي الادى. ول ءۇشىن كاسىپورىن وڭىرلىك كاسىپكەرلەر پالاتاسىنا «اتامەكەن» ۇكپ وقۋ ورتالىقتارى تىزىلىمىنە ەنگىزۋ ءۇشىن ءوتىنىم جىبەرىپ، وقۋ ورتالىعىن قۇرۋى كەرەك. 2017-2018 جىلدارى وڭىردەگى 9 وقۋ ورتالىعى جۇمىسپەن قامتۋ ورتالىقتارىنان جۇمىسسىزداردى وقىتۋ بويىنشا مەملەكەتتىك تاپسىرىستى الدى.

بۇدان بولەك، ناريمان ابىلشايىقوۆ ءدۋالدى ءبىلىم بەرۋ جول كارتاسىن جۇزەگە اسىرىلۋى تۋرالى مالىمەت بەردى. ونىڭ ايتۋىنشا، بيزنەس، كوللەدج جانە ستۋدەنتتەردىڭ ۇشجاقتى مۇددەلىلىگى ەسەبىنەن سوڭعى جىلدارى  مامانداردى دايىنداۋدا جول كارتاسى قاتىسۋشىلارىنىڭ – كوللەدج بىتىرۋشىلەرىنىڭ جۇمىسپەن قامتىلۋ پايىزى ۇنەمى وسۋدە. ءدۋالدى وقىتۋ اياسىندا 2017 جىلى تۇلەكتەر اراسىندا جۇمىسپەن قامتىلۋ 71%-دى قۇرادى، بىلتىر كورسەتكىش – 79%-عا جەتتى. ءبىلىم بەرۋ باسقارماسىنىڭ دەرەكتەرى بويىنشا تۇلەكتەردىڭ ءدۋالدى ءبىلىم بەرۋ كارتاسىنان تىس جۇمىسقا ورنالاسۋ كورسەتكىشى –71,2%.

وبلىستان ءدۋالدى ءبىلىم بەرۋ جول كارتاسىنا بارلىعى  تەحنيكالىق جانە كاسىپتىك ءبىلىم بەرۋ مەكەمەلەرىنىڭ 2310 ستۋدەنتى قاتىستى. وبلىستىڭ 24 كوللەدجى مەن 231 كاسىپورنى اراسىندا  20 ماماندىق پەن 10 سالا بويىنشا  مامانداردى بىرلەسىپ وقىتۋ تۋرالى كەلىسىمدەر جاسالدى.

Abai.kz