قازىرگى دۇنيەجۇزىنىڭ الەۋمەتتىك-ەكونوميكالىق دامۋىنا بارىنشا ىقپال جاساپ وتىرعان نارىق جاعدايىندا، قوعامداعى ءاربىر ادامدى ازىق-تۇلىكپەن قامتاماسىز ەتۋگە قاتىسى بار سالالاردىڭ ىشىندە قانت ءوندىرۋ ايرىقشا ورىن الادى. سوندىقتان، الەم ەلدەرى قانت ءوندىرىسىن جىلدان-جىلعا مولايتىپ وتىر. وسىنىڭ ناتيجەسىندە كەيىنگى 10-15 جىلدا الەمدەگى قانت ءوندىرىسىنىڭ ءونىمى 30 پايىزعا كوبەيىپ، جالپى وندىرىلگەن قانتتىڭ مولشەرى 100 ملن توننادان استى.

قانت قىزىلشاسى – جەتىسۋ جەرىنىڭ ءتول داقىلى. رەسپۋبليكا بويىنشا وندىرىلەتىن ءتاتتى ءتۇبىردىڭ  ەداۋىر كولەمى الماتى وبلىسىنا تيەسىلى ەكەن. ءتىپتى، قازاقستان اۋماعىندا قانت قىزىلشاسىنىڭ ەڭ العاش رەت تالدىقورعان وڭىرىندە وسىرىلگەن. جەتىسۋ ءوڭىرى ەجەلدەن تابيعاتتىڭ وزىنە بەرگەن بيوكليماتتىق ەرەكشەلىكتەرى مەن سۋىنىڭ مولدىعى، جەرىنىڭ قۇنارلىلىعى، قانت قىزىلشاسىن باپتاپ وسىرۋدە، ودان مول ءونىم الۋعا قولايلى ايماق بولىپ تابىلادى. ودان بولەك، كەڭەس وداعى كەزىندە قازاقستاندا قانت وندىرەتىن سەگىز زاۋىتتىڭ بەسەۋى وسى جەتىسۋ جەرىندە ورنالاسقان ەكەن.

وتكەن جىلى الماتى وبلىسىنداعى كوكسۋ جانە اقسۋ قانت زاۋىتتارى 42 مىڭ توننا اق قانت ءوندىردى. جالپى قانت قىزىلشاسىنىڭ القابى 11,2 مىڭ گەكتارعا جەتىپ، 2014 جىلمەن سالىستىرعاندا 10 ەسەگە ءوستى. 442 مىڭ توننا قىزىلشا جينالىپ، ءار گەكتاردىڭ ورتاشا ونىمدىلىگى 400 تسەنتنەرگە جەتتى، ال ەسكەلدى اۋدانىندا 520 تسەنتنەردەن ءونىم الىندى. بۇل تۋرالى بۇگىن تالدىقورعانداعى ب. ريموۆا اتىنداعى دراما تەاتر عيماراتىندا وتكەن وبلىس اكىمىنىڭ ەسەپ بەرۋ جيىنىندا اماندىق باتالوۆ ايتتى.

سول سياقتى وبلىس اكىمى بيىلعى جىلى قانت قىزىلشاسىنىڭ كولەمىن 14 مىڭ گەكتارعا جەتكىزىپ، 485 مىڭ توننا ءتاتتى ءتۇبىر الۋ جوسپارلانىپ وتىرعانىن دا اتاپ ءوتتى. الاكول جانە قارابۇلاق قانت زاۋىتتارىن قالپىنا كەلتىرۋ، قاپشاعاي قالاسىندا جاڭا قانت زاۋىتىن سالۋ كوزدەلۋدە.

«ەندىگى ءبىزدىڭ ماقساتىمىز - زاۋىتقا تاپسىرىلعان ءونىم ءۇشىن شارۋاشىلىقتارعا تولەمدى وسى ايدىڭ سوڭىنا دەيىن اياقتاۋ»، - دەدى ا. باتالوۆ.

Abai.kz