قازاقستان – قايتا تۇلەۋدىڭ، تۇراقتىلىق پەن ىنتىماقتىڭ، تاريحي وقيعالاردىڭ وتانى.

تاۋەلسىزدىك تۋىن العاش كوتەرگەن كۇننەن باستاپ، وسى جىلدار ارالىعىندا ورىن العان وقيعالاردىڭ ءبارى كوز الدىمىزدا. ءوز ءانۇرانىمىزدىڭ العاش شىرقالعانى، ەلتاڭبامىزدىڭ مەكەمەمىزدىڭ ماڭدايشاسىنا العاش ىلىنگەنى، ۇلتتىق ۆاليۋتامىزدىڭ العاش قولدانىسقا ەنگەنى، كەيىنگى جىلدارداعى ەكونوميكالىق ورلەۋ، ەلىمىزدىڭ حالىقارالىق ۇيىمداردا كوشباسشى رەتىندە تانىلۋى، ازيادا، ەكسپو سىندى ءىرى حالىقارالىق شارالار... ءبىز وسىنىڭ بارىنە كۋامىز.

ەگەمەندى ەل رەتىندەگى ەستەن كەتپەس تاعى ءبىر تاريحي وقيعا ەلوردامىز استانا قالاسىنىڭ سالىنۋى. ەڭسەسىن ەندى عانا تىكتەگەن جاس مەملەكەتتىڭ الەمدى اۋزىنا قاراتقان وسىنداي الىپ قالا سالۋى ۇلكەن تاۋەكەل ءارى تاريحي شەشىم. مۇنى تەك قازاقستان حالقى عانا ەمەس، بۇكىل الەم ايتۋدا.

مۇندا وسىناۋ تاريحي شەشىمدى قابىلداپ، ۇلتتىق سيپاتتاعى قالانىڭ ىرگەتاسىن قالاعان ۇلت كوشباسشىسى نۇرسۇلتان نازارباەۆتىڭ ەڭبەگى ەرەن. ءوزى باسشىلىققا الىپ بايتەرەك، حانشاتىر، «قازاق ەلى» مەموريالدى كەشەنى سىندى نىسانداردى جاڭا استانانىڭ، قالا بەردى، بارشا حالىقتىڭ كوز قۋانىشى، ماقتانىشىنا اينالدىردى.

19 ناۋرىز كۇنى نۇرسۇلتان ءابىشۇلى جالپى حالىققا مالىمدەمە جاساپ، پرەزيدەنتتىك وكىلەتتىگىن توقتاتاتىنىن ايتتى. مەملەكەت باسشىسى بولىپ قاسىم-جومارت توقاەۆ بەكىتىلدى. مىنە، قازاقستان جارقىن بولاشاققا قاراي تاعى ءبىر قادام باستى.

جاڭا مەملەكەت باسشىسى بارشا قازاقستاندىقتاردىڭ الدىندا ەلوردامىزعا «نۇر-سۇلتان» اتاۋىن بەرۋ جونىندە ۇسىنىس ءبىلدىردى. بۇل ورىندى ۇسىنىس. بۇل الەم حالىقتارىنىڭ تاجىريبەسىندە بار دۇنيە. سونىمەن قاتار، ەلباسىنىڭ استانا قالاسىنىڭ سالىنۋىندا سىڭىرگەن ەڭبەگىن ەش نارسەمەن ولشەۋ مۇمكىن ەمەس.

قازاقستان جازۋشىلار وداعى باسقارماسى حاتشىلىعى ەلوردامىزدىڭ اتاۋىن «نۇر-سۇلتان» دەپ وزگەرتۋ جونىندەگى شەشىمدى قۇپتايدى.

ەلوردامىز نۇر-سۇلتان قالاسىنىڭ ءالى دە كوركەيە تۇسەرىنە، حالىقتىڭ مەرەيى ۇستەم بولارىنا سەنىمدىمىز.

Abai.kz