بۇگىن استانادا القا-قوتان جيىن ءوتتى. وعان ەلباسى ن.نازارباەۆتىڭ ءوزى توراعالىق ەتتى. جيىلىسقا قاتىسقاندار ەلدەگى الەۋمەتتىك ساياساتتى ىسكە اسىرۋ ماسەلەلەرىن تالقىلادى. 

ەلباسى توراعالىعىمەن وتكەن جيىنعا ۇكىمەت باسشىسى اسقار مامين، پرەزيدەنت اكىمشىلىگىنىڭ جەتەكشىسى اسەت يسەكەشەۆ، ۆيتسە-پرەمەر-مينيستر گۇلشارا ابدىحالىقوۆا قاتىسقان.

جيىندى اشىپ، ءسوز سويلەگەن ەلباسى ن.نازارباەۆ حالىقتىڭ ءال-اۋقاتىن ارتتىرۋ مەن تۇرمىس ساپاسىن جاقسارتۋ ءۇشىن قابىلدانعان باعدارلامالاردى جۇزەگە اسىرۋعا توقتالدى.

قازىرگى كۇن تارتىبىندە قارالۋى ءتيىس - كوپ بالالى انالاردىڭ جاعدايىن دا ءسوز ەتتى. ۇكىمەتتەن بولىنەتىن اتاۋلى الەۋمەتتىك كومەكتى 1 ساۋىردەن باستاپ بەرۋدى تاپسىردى.

"كومەككە اسا مۇقتاج تابىسى از ازاماتتار، كوپبالالى وتباسىلار بيىلعى 1 ساۋىردەن باستاپ الەۋمەتتىك كومەكتى الۋى ءتيىس", - دەدى نۇرسۇلتان نازارباەۆ.

ەلباسى مەملەكەتتىك ورگاندار باسشىلارى مەن وبلىس اكىمدەرىنىڭ جۇمىسىن باعالاۋ ازاماتتاردىڭ ءال-اۋقاتى مەن ءومىر ءسۇرۋ ساپاسى دەڭگەيىنە تىكەلەي بايلانىستى بولاتىنىن اتاپ ءوتتى.

ايتا كەتەيىك، اتاۋلى الەۋمەتتىك كومەك (ااك) جان باسىنا شاققانداعى ورتاشا تابىسى كەدەيشىلىك شەگىنە دە جەتپەيتىن ازاماتتارعا تاعايىندالادى. ال بۇگىنگى تاڭدا كەدەيشىلىك شەگى ەڭ تومەنگى كۇنكورىس دەڭگەيىنىڭ 50 پايىزىن نەمەسە 14 849 تەڭگەنى قۇرايدى.

ەلباسىنىڭ تاپسىرماسىنا سايكەس، ەندى كەدەيشىلىك شەگى ەڭ تومەنگى كۇنكورىس دەڭگەيىنىڭ 50 ەمەس، 70 پايىزىن قۇرايدى. دەمەك، بۇل 20 789 تەڭگە دەگەن ءسوز. ياعني، وسىعان دەيىن اتاۋلى الەۋمەتتىك كومەك الىپ جۇرگەندەردىڭ قولىنا 14 849 تەڭگە تيسە، ەندى 20 789 تەڭگە بەرىلمەك.

Abai.kz